þriðjudagur, 24. september 2019
 
TölublöðVenjuleg útgáfa

Hagnaður Samherja nam 8,7 milljörðum árið 2018

28. ágúst 2019 kl. 15:19

Þorsteinn Már Baldvinsson, forstjóri Samherja.

Árið 2018 var fyrsta heila árið sem Samherji gerir ekki út á neinn bolfisktogara frá Íslandi

Tekjur Samherja námu um 43 milljörðum króna árið 2018 og hagnaðurinn af rekstri nam 8,7 milljörðum. Þetta kemur fram í tilkynningu frá fyrirtækinu. Á aðalfundi var ákveðið að 7,7 prósent af hagnaði verði greitt í arð til hluthafa, sem gerir tæplega 670 milljónir króna.

„Samherji skilaði góðri rekstrarniðurstöðu á árinu 2018,“ er haft eftir Þorsteini Má Baldvinssyni forstjóra í tilkynningunni.

„Árið var að sumu leyti sérstakt fyrir okkur. Þetta er fyrsta heila árið sem Samherji gerir ekki út neinn bolfiskfrystitogara frá Íslandi. Félagið hóf rekstur með einum frystitogara og þeir hafa í gegnum tíðina gegnt veigamiklu hlutverki í rekstri okkar þannig að þetta er mikil breyting á fyrirtækinu. Sjófrystingu á uppsjávarfiski lauk einnig á árinu með sölu á Vilhelm Þorsteinssyni EA sem hefur verið eitt fengsælasta skip Íslandssögunnar".

Þorstenin Már segir að búið sé að „einfalda samstæðu Samherja og er þetta fyrsta árið þar sem Samherji hf. heldur einungis utan um starfsemi okkar á Íslandi og í Færeyjum. Við höfum í gegnum árin gert miklar breytingar í rekstrinum, meðal annars til að takast á við breytingar á neysluvenjum neytenda og auknum kröfum þeirra. Með árvekni höfum við haldið stöðu okkar í fremstu röð meðal sjávarútvegsfyrirtækja í heiminum.  Allt útheimtir þetta meiri vinnu og eykur álag á starfsfólk.  Við höfum tekist á við þessar breytingar saman og náð árangri. Það er ekki sjálfgefið og fyrir það er ég þakklátur.“

segir Þorsteinn Már Baldvinsson forstjóri Samherja þegar ársuppgjör fyrir árið 2018 var kynnt að loknum aðalfundi.

Samherji er áfram í hópi stærstu skattgreiðenda landsins og greiddu Samherji og starfsmenn um 4,7 milljarða til hins opinbera á Íslandi árið 2018.

„Við höfum haldið áfram uppbyggingu á innviðum Samherja. Nýlega var sjósettur nýr togari Útgerðarfélags Akureyringa sem fær nafnið Harðbakur. Framkvæmdir við nýja fiskvinnslu á Dalvík halda áfram af fullum krafti og stefnt er á að geta hafið vinnslu í nýju og glæsilegu hátæknihúsi á fyrsta ársfjórðungi 2020. Þá á að afhenda Vilhelm Þorsteinsson, nýtt uppsjávarskip okkar, um mitt sumar 2020. Það eru spennandi tímar framundan“ segir Þorsteinn Már.

Ársreikning Samherja hf. má nálgast hjá ársreikningaskrá á næstu dögum en á vef fyrirtækisins eru birtar lykiltölur úr rekstrinum árið 2018.