miðvikudagur, 1. apríl 2020
 
TölublöðVenjuleg útgáfa

Hampiðjan kaupir tvö félög í Skotlandi

21. febrúar 2020 kl. 07:00

Hampiðjan

Kaupin eru að hluta trygging fyrirtækisins í ljósi þess hvernig samningar er varða Brexit verða í framtíðinni. Með kaupunum mun staða Hampiðjunnar ekki breytast á þessum markaði óháð niðurstöðunni.

Hampiðjan hefur skrifað undir samkomulag um kaup á 80% hlut í skosku félögunum Jackson Trawl Limited og Jackson Offshore Supply Limited í Peterhead í Skotlandi.

Jackson Trawl er leiðandi í sölu veiðarfæra á Bretlandseyjum og Jackson Offshore selur einkum kaðla, lyftistroffur og járnavöru til olíuiðnaðarins í Skotlandi. 

Þetta kemur fram í tilkynningu frá fyrirtækinu.

Þar segir að seljendur eru bræðurnir Mark og Stephen Buchan og fjölskyldur þeirra en bræðurnir hafa stjórnað fyrirtækjunum undanfarna áratugi eftir að faðir þeirra Arthur Buchan dró sig í hlé vegna aldurs. Faðir hans, John Buchan, stofnaði fyrirtækið 1962 og fyrirtækið verður því 58 ára á þessu ári. Þeir bræður munu stýra fyrirtækjunum eftir sem áður.

„Töluverð samlegðaráhrif eru af kaupunum fyrir Hampiðjuna og sem munu koma fram á þessu ári og þeim næstu.  Viðskiptavinir beggja félaganna í Skotlandi munu njóta góðs af kaupum Hampiðjunnar því með þeim fá félögin aðgang að tækniþekkingu og vörum Hampiðjunnar í veiðarfærum og sérútbúnum vörum fyrir olíuiðnaðinn,“ segir í tilkynningunni.

Kaupverð hlutanna nemur rúmum 9,7 milljónum evra og er fjármagnað með láni frá Arion banka hf. að fjárhæð 6,4 milljónir evra ásamt handbæru fé Hampiðjunnar hf. Það er tæplega 1,5 milljarður íslenskra króna.

„Með þessum kaupum styrkir Hampiðjan stöðu sína enn frekar við N-Atlantshaf sem er mikilvægasti markaður samstæðunnar. Innan landhelgi Stóra-Bretlands eru auðug fiskimið þar sem verðmætustu tegundirnar eru makríll, kolmunni og sandsíli en skip frá Evrópubandalaginu hafa veitt meirihluta aflans undanfarin ár.  Það gæti breyst með samningum í kjölfar Brexit en Hampiðjan hefur hins vegar með þessum kaupum tryggt stöðu sína óháð því á hvorn veginn sem þeir samningar fara í framtíðinni,“ segir jafnframt í tilkynningu Hampiðjunnar.