miðvikudagur, 21. ágúst 2019
 
TölublöðVenjuleg útgáfa

Harðbakur EA sjósettur í Noregi

2. ágúst 2019 kl. 10:15

Harðbakur EA sjósettur í Noregi. MYND/Samherji

Nýr togari Útgerðarfélags Akureyringa kemur til landsins eftir miðjan október og byrjar veiðar í upphafi næsta árs.

Togararnir sjö, sem skipasmíðastöðin Vard í Noregi tók að sér að smíða fyrir fjögur íslensk útgerðarfyrirtæki, eru nú hver á fætur öðrum væntanlegir til landsins.

Vestmannaey VE, nýtt skip Síldarvinnslunnar í Vestmannaeyjum, var fyrst skipanna sjö til að koma til landsins. Hún sigldi inn í Vestmannaeyjahöfn í síðasta mánuði.

Samherji greinir svo frá því að nýr togari Útgerðarfélags Akureyringa, sem fær nafnið Harðbakur, hafi verið sjósettur í dag. Hann fær skrásetningarnúmerið EA 3.

„Þetta nafn og númer hafa togarar ÚA áður farsællega borið,“ segir í tilkynningunni.

Samningur um smíðina var undirritaður í lok nóvember árið 2017. Skipið er hannað af Vard samsteypunni í Noregi í samvinnu við eigendur og er eitt af sjö skipum sem fjórar íslenskar útgerðir tóku sig saman um að láta smíða.

Skipin eru 28,95 metra löng og 12 metrar á breidd og eru smíðuð samkvæmt íslenskum reglum og kröfum flokkunarfélagsins  DNV GL.

Áætluð afhending togarans frá Vard-Aukra er um miðjan október og siglir skipið þá til heimahafnar. Þar tekur Slippurinn Akureyri við því og settur verður um borð vinnslubúnaður, sem þar verður smíðaður. Áætlað er að Harðabakur hefji veiðar í byrjun nýs árs.