laugardagur, 19. júní 2021
 
TölublöðVenjuleg útgáfa

HB Grandi tekur þátt í tíunda sinn

5. maí 2014 kl. 13:51

Sýningarbás HB Granda í Brussel fyrir nokkrum árum.

Sjávarútvegssýningin í Brussel hefst á morgun

Á morgun hefst stærsta sjávarútvegssýning heims sem haldin er í Brussel í Belgíu á hverju ári. Sýningin stendur yfir dagana 6. til 8. maí. HB Grandi er í hópi 38 íslenskra fyrirtækja sem kynna þar framleiðsluvörur sínar og þjónustu.

,,Þetta er tíunda sinn sem við tökum þátt undir okkar eigin vörumerki,“ segir Brynjólfur Ejólfsson, markaðsstjóri HB Granda. 

Alls munu um 20 starfsmenn félagsins taka þátt í þessum viðburði og standa vaktina á sýningarbás félagsins. ,,Þetta er auðvitað mjög mikilvæg sýning fyrir okkur, bæði til að hitta núverandi viðskiptavini og nýja. Það, sem verður nýtt hjá okkur að þessu sinni, er að við kynnum vörur frá dótturfyrirtæki okkar Vigni G. Jónssyni og þurrkaðar afurðir, sem bætast við í kjölfar samruna við Laugafisk. Þá munum við sömuleiðis kynna með stolti þá alþjóðlegu vottun sem við, Íslendingar, höfum fengið á veiðar á gullkarfa með sjálfbærum hætti,“ segir Brynjólfur í samtali á vef HB Granda.

Sjávarútvegssýningin í Brussel skiptist í tvo hluta. Annars vegar er sýning fyrir framleiðendur afurða og svo hins vegar þá sem framleiða tæki og þjónusta sjávarútveginn. Á vef Íslandsstofu kemur fram að alls sýna 33 fyrirtæki undir hatti merktum ICELAND á því svæði sem Íslandsstofa ráðstafar. Þar af eru 15 fyrirtæki í véla-, tækja- og þjónustuhlutanum og 18 fyrirtæki í sjávarafurðahlutanum. Að auki sýna 5 önnur íslensk fyrirtæki á sýningunni.

Á heimasíðu sjávarútvegssýningarinnar í Brussel kemur fram að búast megi við um 26.000 seljendum og kaupendum á sýninguna frá alls 146 löndum. Í fyrra sóttu hana um 26.000 aðrir gestir