miðvikudagur, 8. desember 2021
 
TölublöðVenjuleg útgáfa

Heldur rólegt yfir síldveiðum

22. nóvember 2021 kl. 13:00

Beitir NK 123. Mynd/Hafþór Hreiðarsson

Fínustu lóðningar sjást en holin hafa hins vegar skilað minna af síld en væntingar standa til.

Veiðin á íslenskri sumargotssíld vestur af landinu hefur verið heldur róleg að undanförnu. Skipstjórar skipa Síldarvinnslunnar segja í frétt Síldarvinnslunnar að það vanti allan kraft í veiðina.

Beitir NK kom til Neskaupstaðar sl. laugardag með 700 tonn og í kjölfar hans kom Vilhelm Þorsteinsson EA með 1.300 tonn þannig að vinnsla er í fullum gangi í fiskiðjuverinu eftir nokkurt hlé. Barði NK er síðan á leiðinni austur með rúm 900 tonn og er hann væntanlegur til hafnar á morgun.

Tómas Kárason, skipstjóri á Beiti, segir í viðtali við heimasíðu fyrirtækisins að síldveiðin mætti ganga betur.

„Veiðin hjá okkur var með rólegasta móti en annars stoppuðum við ekki lengi á miðunum. Það voru fínustu lóðningar en holin skiluðu hins vegar heldur litlu. Síldin er á mikilli hreyfingu þarna og það er allavega hluti af skýringunni á því að oft fæst minna en gera má ráð fyrir“, segir Tómas.

Beitir mun láta úr höfn í kvöld og það er annað hvort síld eða loðna á dagskránni hjá Beitismönnum.