sunnudagur, 19. september 2021
 
TölublöðVenjuleg útgáfa

Hlustið á neyðarrás 16!

15. maí 2013 kl. 13:38

Frá stjórnstöð Landhelgisgæslunnar (Mynd: LHG).

Ekki náðist í nærstadda báta þegar bátur fékk í skrúfuna við Snæfellsnes.

Nú þegar strandveiðar eru komnar í fullan gang hafa allnokkur tilfelli komið upp þar sem erfitt hefur verið að ná í báta sem eru að veiðum en þeir eiga að nota neyðarrás 16 á VHF og ber skylda til að hafa hana opna. Einnig hefur verið erfitt að ná í farsíma um borð.

Er slíkt afar bagalegt þegar Landhelgisgæslan þarf nauðsynlega að kalla á aðstoð fyrir báta sem lenda í vandræðum á sama svæði. Allnokkur slík atvik hafa komið upp. Í gær fékk bátur í skrúfuna við Snæfellsnes, rak hratt að landi og óskaði eftir aðstoð. Þrátt fyrir ítrekuð köll á rás 16 og hringingar í farsíma náðu varðstjórar í stjórnstöð ekki báta á svæðinu þrátt fyrir að á svæðinu væri ágæt sjósókn. Jákvætt er að í mörgum tilfellum virðast bátarnir halda hópinn sem eykur til muna öryggi þeirra.

Klukkan níu í morgun voru rúmlega sjöhundruð bátar á sjó, af þeim eru 23 sem greiningardeild Landhelgisgæslunnar þarf að hafa samband við þar sem áhöfn er ekki lögskráð.

Frá þessu er skýrt á vef Landhelgisgæslunnar.