mánudagur, 13. júlí 2020
 
TölublöðVenjuleg útgáfa

Hreinsa strendur af drauganetum

2. júní 2020 kl. 15:38

Drauganet geta veitt og drepið fisk svo árum skiptir. Aðsend mynd

Átak sem verður fjármagnað af umhverfissjóði Norsku smásölusamtakanna og gengur undir heitinu Net Free Seas, Netalaus höf.

Umhverfissamtökin Environmental Justice Foundation (EJF) mun stýra átaki sem ráðist verður í til þess að hreinsa hafið í kringum Tæland af drauganetum. Netin verða endurunnin og notuð til framleiðslu á varningi eins og íþróttavörum og eldhúsbúnaði.

Átakið verður fjármagnað af umhverfissjóði Norsku smásölusamtakanna og gengur undir heitinu Net Free Seas, Netalaus höf. Kjarni átaksins verður að þjálfa strandsamfélög í Tælandi að safna saman ónýtum veiðarfærabúnaði, svokölluðum drauganetum, sem alls kyns sjávardýr flækjast í og sem verður þeim aldurtila. Sömuleiðis miðar verkefnið að því að leiðbeina fiskimönnum hvernig komast megi hjá því að tapa veiðarfærum meðan á veiðum stendur.

Allt í endurvinnslu

Öll þau net sem safnast verða hreinsuð með saltvatni, þjappað saman í bagga og flutt til næsta endursvinnsluaðila. Þar verða baggarnir tættir niður í litlar perlur sem verður dreift til notkunar hjá ýmsum framleiðslufyrirtækjum. EJF hefur þegar samið við tvö fyrirtæki um notkun á þessu endurunna hráefni, þ.e. tælenska hönnunarfyrirtækið Qualy og Starboard sem framleiðir búnað sem notaður er við vatnaíþróttir.

Tilraunaverkefni í þessa veru í fyrra í samstarfi við þrjú strandsamfélög skilaði á land einu tonni af drauganetum á einu ári. EJF bindur vonir við að strandsamfélögin verði nú alls tíu talsins og afraksturinn verði 5 tonn af drauganetum á einu ári.

„Net eru gerð úr plastefnum. Þau drepa fisk og aðrar sjávarlífverur áratugum saman áður en þau brotna niður í örplast. Það er því ákaflega mikilvægt að hreinsa hafið af drauganetum og öðrum veiðarfærabúnaði. Við bindum miklar vonir við átakið sem EJF stýrir,“ segir Rasmus Hansson, stjórnarformaður Umhverfissjóðs Norsku smásöluverslunarinnar.