miðvikudagur, 13. nóvember 2019
 
TölublöðVenjuleg útgáfa

Í góðri þorskveiði fyrir norðan land

24. júlí 2019 kl. 10:00

Viðey á útleið frá Sauðárkróki í vikunni. Mynd/Jón Steinar Sæmundsson

Akurey og Viðey veiða þorsk á Vestfjarðamiðum - landa á Sauðárkróki en aflanum er keyrt til vinnslu í Reykjavík.

Ísfisktogari HB Granda - Akurey AK - kom til hafnar á Sauðárkróki í vikunni með rúmlega 130 tonna afla. Þetta er í annað sinn sem togarinn kemur inn til löndunar á Sauðárkróki en aflanum er ekið til vinnslu í Reykjavík.

Frá þessu segir á heimasíðu fyrirtækisins.

Á þessum tíma árs hafa ísfisktogarar HB Granda aðallega verið að veiðum á Vestfjarðamiðum en Eiríkur Jónsson, skipstjóri á Akurey, segir í fréttinni að þar hafi verið lítill sem enginn þorskur í allt sumar.

„Það virðist vanta æti fyrir fiskinn á Vestfjarðamiðum. Þar er engin loðna og því leitar fiskurinn annað,“ segir Eiríkur en að hans sögn byrjaði hann að þessu sinni út með hrauninu norðan við Kolbeinsey en þangað er um átta til níu tíma sigling frá Sauðarkróki.

„Þorskurinn var nokkuð dreifður en eftir að við fundum hann í veiðanlegu magni voru aflabrögð mjög góð. Við fórum út síðdegis á fimmtudag þannig að við náðum fjórum dögum á veiðum. Við enduðum veiðar svo á Sporðagrunni en þaðan er bara fimm tíma sigling til Sauðárkróks.“

Að sögn Eiríks var Viðey RE að veiðum á sömu slóðum en sá ísfisktogari er nú í sínum þriðja túr þar sem aflanum er landað á Sauðárkróki.

„Við eigum að veiða þorsk og á meðan svo er þá er ágætt að gera héðan út. Það tekur ekki nema þrjá og hálfan tíma að aka aflanum til Reykjavíkur og þetta er því ferskt og gott hráefni,“ segir Eiríkur.