mánudagur, 14. júní 2021
 
TölublöðVenjuleg útgáfa

,,Íslendingar eru sjóræningjar nútímans“

15. júní 2012 kl. 10:32

Makríll

Norðmenn segjast ekki bjóða einum makríl meira í makríldeilunni.

,,Íslendingar eru og munu verða sjóræningjar nútímans og það er ekki á dagsskrá að láta þá ræna meiri makríl,“ segir Reidar Nilsen forustumaður Norges Fiskarlag, heildarsamtaka í norskum sjávarútvegi, í samtali við Fiskeribladet/Fiskaren í dag. 

Norski sjávarútvegsráðherrann, Lisbeth Berg-Hansen, hélt í fyrradag fund með forsvarsmönnum samtaka í norskum sjávarútvegi og verkalýðssamtökunum til þess að kynna stöðuna í makríldeilunni og ræða stefnumörkun í frekari viðræðum. 

Audun Maråk framkvæmdastjóri samtaka norskra útgerðarmanna (Fiskebåt) segist hafa verið ánægður með fundinn með ráðherranum og ekkert sem bendi til þess að ríkisstjórnin ætli að gefa meira eftir í viðræðunum. 

Maråk segir nýja rannsóknir sýna að göngur makrílsins séu að færast meira norðaustur á bóginn í átt til Noregs og það muni trúlega leiða til þess að minna verði um makríl í íslenskri lögsögu. Stofninn sé sterkur og því sé ekki hundrað í hættunni þótt ekki náist samningar strax.