sunnudagur, 25. ágúst 2019
 
TölublöðVenjuleg útgáfa

Íslensku sjávarútvegsverðlaunin 2014 afhent

26. september 2014 kl. 09:00

Merki Íslensku sjávarútvegssýningarinnar

Ísfélagið, HB Grandi og Skinney-Þinganes meðal verðlaunahafa.

Íslensku sjávarútvegsverðlaunin 2014 voru afhent við athöfn í Gerðasafni í gærkvöldi. 

Verðlaunin eru í mörgum flokkum og snúa annars vegar að einstaklingum og fyrirtækjum í sjávarútvegi sem þykja hafa skarað fram úr og hins vegar að framleiðslufyrirtækjum tækja og búnaðar. 

Víðir Jónsson var valinn í flokknum Framúrskarandi fiskimaður, eins og fram kemur í frétt hér annars staðar á vefnum. 

Í flokknum Framúrskarandi útgerð hlaut Ísfélag Vestmannaeyja viðurkenninguna fyrir að taka frumkvæði og endurnýja skipaflota sinn með nýsmíði tveggja glæsilegra uppsjávarskipa á skömmum tíma.

HB Grandi hlaut verðlaunin í flokknum Framúrskarandi fiskvinnsla fyrir að leggja ríka áherslu á háþróaða tækni í vinnslu og stöðuga þróun framleiðslunnar.

Forráðamenn Skinneyjar-Þinganess hlutu viðurkenninguna í flokknum Framúrskarandi framlag til sjávarútvegs fyrir ötula uppbyggingu glæsilegs sjávarútvegsfyrirtækis sem er burðarásinn í byggðarlagi sínu.

Pólar toghlerar hlutu verðlaunin „Besta nýjungin“ fyrir hönnun og þróun nýrrar gerðar toghlera með fjarstýranlegum vængjum sem auðvelda skipstjórnarmönnum að beina trollinu að fisktorfum.

Í flokknum Framúrskarandi íslenskur framleiðandi – veiðar (stærri og smærri fyrirtæki) hlaut Hampiðjan viðurkenninguna fyrir þróun og framleiðslu á hágæðaveiðfærum og fyrirtækin 3X Technology / Skaginn fyrir nýjungar í tækjabúnaði í skip sem stuðla að bættum hráefnisgæðum.

Í flokknum Framúrskarandi íslenskur framleiðandi – fiskvinnslubúnaður (stærri og minni fyrirtæki) hlaut Marel viðurkenninguna fyrir að vera í fararbroddi á heimsvísu í þróun og framleiðslu á háþróuðum búnaði og kerfum til vinnslu á fiski, og Valka fyrir glæsilegan árangur í framleiðslu hágæðabúnaðar og hönnun sjálfvirknilausna fyrir fiskiðnaðinn.

Í flokknum Framúrskarandi framleiðandi „á heildina séð“ varð Marel fyrir valinu. 

Auk þessa hlutu nokkur erlend framleiðslufyrirtæki verðlaun.