sunnudagur, 25. ágúst 2019
 
TölublöðVenjuleg útgáfa

Kerecis kaupir svissneskt fyrirtæki

7. febrúar 2019 kl. 11:10

Vinnsla á sáraroði. Mynd/Kerecis

Sáraroð fyrirtækisins hefur verið samþykkt sem meðhöndlunarúrræði á svissneskum spítölum og göngudeildum.

Svissnesk heilbrigðisyfirvöld tilkynntu Kerecis í þessari viku að sáraroð fyrirtækisins hafi verið samþykkt sem meðhöndlunarúrræði á svissneskum spítölum og göngudeildum.

Þetta kemur fram í fréttatilkynningu frá fyrirtækinu. Þar segir jafnframt (millifyrirsagnir eru Fiskifrétta):

Sviss er fyrsta Evrópulandið sem samþykkir sáraroðið sem meðhöndlunarúrræði bæði á spítölum og göngudeildum og greiðir fyrir notkun á báðum stöðum. Samþykkið mikilvægur áfangi fyrir Kerecis og útbreiðslu sáraroðs sem almenns meðhöndlunarúrræðis fyrir erfið þrálát sár sem leitt geta til aflimunar.

Fyrir er sáraroðið selt í nokkrum Evrópulöndum en eingöngu til spítalanotkunar. Kerecis hefur átt í viðræðum við svissnesk heilbrigðisyfirvöld undanfarin tvö ár og hafa jákvæðar niðurstöður í stórum klínískum prófunum sem Kerecis hefur tilkynnt um undanfarin misseri átt mikilvægan þátt í að afla samþykkisins.

Kaupa svissneskt fyrirtæki

Samhliða viðræðum við Svissnesk heilbrigðisyfirvöld, hefur Kerecis verið í viðræðum um kaup á sárafyrirækinu Phytoceuticals í Zurich til að geta selt vöruna með eigin sölumönnum til svissneskra heilbrigðisstofnanna. Kerecis hefur gengið frá kaupunum og fær með því fjóra sölustarfsmenn í Sviss auk annara starfsmanna. Með þessu er Kerecis með 25 sölumenn í Bandaríkjunum, einn á Íslandi og fjóra í Sviss. Allir þessir sölumenn eru að selja beint til heilbrigðistofnanna. Auk þess selur Kerecis vörur sínar gegnum umboðssölumenn og dreifingaraðila.

Mikil eftirspurn í Sviss

Eftirspurn eftir nýjum meðhöndlunarúrræðum í Sviss fyrir sykursýkissár er mikil. Í Sviss búa 8,5 milljón manns og í landinu er afskaplega vel þróað heilbrigðiskerfi. Svisslendingar verja næst mest allra þjóða í heilbrigðismál og eru Bandaríkin eina þjóðin sem ver hærra hlutfalli af þjóðarframleiðslu í þann málaflokk. Tíðni sykursýki hefur tvöfaldast á síðustu 15 árum í Sviss og er talið að 50.000 manns þjáist þar af sykursýkissárum og að 7500 séu aflimaðir árlega vegna þeirra.

Guðmundur Fertram Sigurjónsson, forstjóri Kerecis:

„Sviss er fyrsta landið sem samþykir sáraroðið bæði til sjúkrahúsnotkunar og göngudeildarnotkun. Greiðsla fyrir vöruna í Sviss er mikilvægt skref fyrir okkur á Evrópumarkaði. Það eru hinsvegar 50 lönd í Evrópu og gríðarmikil vinna að sannfæra heilbrigðisyfirvöld í þeim öllum um að greiða fyrir vöruna“.

„Það hefur gengið vel hjá okkur að selja sáraroðið á Bandaríkjamarkaði og höfum við nú þrefaldað söluna þar þrjú ár í röð. Með þessari ákvörðun Svissneskra heilbrigðisyfirvalda er aðgangur Svisslendinga orðin sá sami að roðinu og Bandaríkjamanna“.

„Á eftir Bandaríkjamönnum verja Svisslendingar næst-hæstu hlutfalli þjóðartekna í heilbrigðismál og þess vegna ákjósanlegur áherslumarkaður fyrir Kerecis. Við höfum undanfarna mánuði verið að skoða Phytoceuticals sem mögulegan samstarfsaðila í Sviss og eftir ítarlega skoðun ákveðið að kaupa fyrirtækið. Eftir kaupin rekur fyrirtækið auk höfuðstöðva fyrirtækisins á Ísafirði, starfstöðvar á DC svæðinu í Bandaríkjunum, í Reykjavik, í Zurich og er fjöldi starfsmanna um 80 manns“.

Eduardo Theiler forstjóri, Phytoceuticals:

„Það eru stórfréttir að svissnesk heilbrigðisyfirvöld hafi samþykkt notkun og greiðslu á Kerecis Omega3 sáraroðinu í Sviss. Við höfum undanfarið ár unnið að því að kynna rannsóknargögn Kerecis fyrir svissneskum heilbrigðisyfirvöldum og læknum. Þessi vinna hefur nú leitt til þess að varan er greidd í Sviss og næsta skref er að ná til sem flestra heilbrigðisstofanna í Sviss sem meðhöndla hinn ört vaxandi hóp sjúklinga sem þjást af sykursýki og sykursýkissárum.“

Um Kerecis

Kerecis er lækningavörufyrirtæki sem hefur þróað einkaleyfavarða tækni til viðgerða á líkamsvef. Einkaleyfið gildir í yfir 50 löndum. Kerecis er eina fyrirtækið sem framleiðir og markaðssetur roð til læknisfræðilegra nota.

Skaði á líkamsvef getur verið af ýmsum toga, allt frá sárum í kjölfar sykursýki, blóðrásarsjúkdóma og slysa yfir í skaða á líffærum. 

Sáraroð frá Kerecis, ætlað til viðgerðar og meðhöndlunar á húð og sárum, hefur hlotið samþykki bandarískra og evrópskra yfirvalda.

Samkeppnisvörur Kerecis® Omega3 sáraroðsins eru unnar úr ýmsum efnum, s.s. svínshúð, kálfshúð, fósturbelgjum og líkhúð. Í mörgum tilvikum eru menningar- eða trúarlegar hömlur á notkun slíkra vara. Engar slíkar hömlur eru á notkun sáraroðs úr fiski, auk þess sem engir sjúkdómar berast frá fiskum til manna.

Kerecis notar ekki sterk kemísk efni í vinnsluferli vörunnar, öfugt við keppinauta sem nota sterk efni til að fjarlægja allar fitur og uppleysanleg prótein úr græðlingunum þannig að eftir standi aðeins trefjaprótein. Sáraroð frá Kerecis er þykkra og auðveldara í notkun en samkeppnisvörur frá öðrum framleiðendum. 

Í sáraroði Kerecis eru trefjakennd prótein, fitur, sykruprótein og fjölsykrur. Próteinin eru m.a. kollagen, keratin og elastin. Fjölmargar fitugerðir er í roðinu m.a. Omega3 fitusýrur. Rannsóknir sýna að Omega3 fitusýrur hafa bólguminnkandi áhrif auka þess að minnka líkur á ígerð í sárum og öðrum sköðuðum líkamsvef.

Kerecis vinnur að þróun á vörum til viðgerða á heilabasti og kviðslitum, ásamt lækningavörum sem nota má til enduruppbyggingar á brjóstum eftir krabbamein og til nota við magaminnkun. Markmið Kerecis er að tækni fyrirtækisins verði nýtt til viðgerða eða endursköpunar á flóknari líffærum líkamans.