miðvikudagur, 13. nóvember 2019
 
TölublöðVenjuleg útgáfa

Kínverjar vilja meira af sjávarafurðum og kjöti

29. október 2019 kl. 15:30

Kristján Þór Júlíusson ásamt fylgdarliði á fundi með kínverska ráðherranum Zhang Jiwen. Aðsend mynd

Kristján Þór Júlíusson er staddur í Kína og átti í morgun fund þar með Zhang Jiwen, vararáðherra Kína á sviði tollamála og eftirlits með innfultningi matvæla.

Á fundinum lýstu Kínversk stjórnvöld yfir vilja til að auka enn frekar innflutning til Kína frá Íslandi, m.a. með því að greiða frekar fyrir innflutningi á sjávarafurðum, fiskimjöli, laxi og lambakjöti, að því er fram kemur í tilkynningu frá sjávarútvegs- og landbúnaðarráðuneytinu.

Kristján Þór, sjávarútvegs- og landbúnaðarráðherra, hélt til Kína til að sækja sjávarútvegssýninguna í  Qingdao en um er að ræða aðra af stærstu sjávarútvegsýningum í heimi. Ellefu íslensk fyrirtæki taka þátt í sýningunni í ár.

Kristján Þór hefur jafnframt nýtt ferðina til að funda með stjórnvöldum í Kína, m.a. til að fylgja eftir fríverslunarsamning sem tók gildi milli landanna árið 2014.

„Ég mun á fundum mínum með stjórnvöldum í Kína leggja áherslu á frekari þróun fríverslunarsamningsins,“ er haft eftir honum í tilkynningunni. „Það er mikilvægt fyrir Ísland í ljósi þess að Kína er stærsti innflytjandi sjávar- og landbúnaðarafurða í heiminum og verð fyrir t.d. lax er hærra hér en á öðrum mörkuðum. Þá er jafnframt reiknað með að millistéttin í Kína muni stækka umtalsvert á komandi árum. Það er því gríðarstórt hagsmunamál fyrir Ísland að þessi samskipti gangi vel og það er því ánægjulegt að heyra vilja Kínverskra stjórnvalda til að greiða fyrir frekari innflutningi til Kína frá Íslandi.“