mánudagur, 22. júlí 2019
 
TölublöðVenjuleg útgáfa

Kolmunninn veiðist ekki vel

10. júlí 2019 kl. 12:01

Börkur að landa kolmunna í morgun. MYND/Smári Geirsson

Síldarvinnsluskipin Beitir og Börkur hafa verið að kolmunnaveiðum í íslenskri lögsögu austur af landinu síðustu daga.

Beitir kom til hafnar í gærmorgun með 700 tonna afla og Börkur í nótt með um 540 tonn. Síldarvinnslan hf. á Neskaupstað greinir frá þessu og vitnar í Sturlu Þórðarson, skipstjóra á Beiti.

Hann segir að sáralítið af kolmunna hafi verið að sjá. „Við tókum fjögur hol á Rauða torginu og austan við það og þetta var ósköp slakt.“

Hálfdan Hálfdanarson, skipstjóri á Berki, tekur undir með Sturlu. „Það var ansi lítið að sjá þarna og aflinn er ekki mikill eftir sex daga. „Í fyrra komu ágætir dagar á þessum slóðum í júlímánuði en kolmunninn hagar sér með öðrum hætti í ár og virðist ekki þétta sig. Allavega hafa ekki komið góðir veiðidagar ennþá núna,“ segir Hálfdan.