laugardagur, 16. janúar 2021
 
TölublöðVenjuleg útgáfa

Krefjast fjármagns til loðnuleitar

7. janúar 2020 kl. 14:36

Bæjarstjóri Fjarðabyggðar segir mikilvægt að efla þekkingu á tegundinni sem sé mikilvæg, ekki bara fyrir sveitarfélagið heldur þjóðarbúið allt.

Bæjarráð Fjarðabyggðar krefst þess að auknu fjármagni verði veitt til loðnuleitar. 

Þetta kemur fram í frétt Austurfréttar.

„Okkur finnst fólk vera of rólegt í ljósi þess hve mikilvæg loðnan er fyrir þjóðarbúið,“ segir Karl Óttar Pétursson, bæjarstjóri Fjarðabyggðar, í fréttinni þar sem segir jafnframt:

Bæjarráð sveitarfélagsins samþykkti á fundi sínum í gær þar sem lýst er þungum áhyggjum af stöðu loðnuleitar á Íslandsmiðum. Annað skip Hafrannsóknastofnunar er í viðgerð og ekki útlit fyrir að stofnunin hafi nema eitt skip til að senda til loðnuleitar. „Í ljósi þess hversu mikilvægur veiðistofn loðnan er í íslenskum sjávarútvegi þá er ástand þetta með öllu ólíðandi,“ segir í bókuninni.

Þar er skorað á sjávarútvegs- og landbúnaðarráðherra að tryggja strax fjármagn til leitar og mælinga svo hægt sé að kanna með útgáfu veiðiheimilda. Engin loðna fannst við rannsóknir í október. Gullver frá Seyðisfirði, skip Síldarvinnslunnar, kom hins vegar til heimahafnar í gærkvöldi eftir fyrsta túr ársins. Aflinn var 95 tonn, mest þorskur en í frétt á vef fyrirtækisins kemur fram að vart hafi verið við loðnu í fisknum sem skipið fékk út af Austfjörðum.

Í skýrslu sem unnin var fyrir Samtök sjávarútvegssveitarfélaga í fyrra kemur fram að tekjutap þeirra tveggja austfirsku sveitarfélaga þar sem loðna er unnin, Vopnafjarðarhrepps og Fjarðabyggðar, hafi í fyrra numið samanlagt um 300 milljónir króna. Þá er ætlað að tekjur ríkissjóðs hafi rýrnað um 4-5 milljarða króna í fyrra vegna loðnubrestsins.

Þótt bókun bæjarráð sé einkum beint að bráðaaðgerðum, það er að strax verði tryggt fjármagn til leitar fyrir vertíðina sem ætti að vera að hefjast, segir Karl einnig þörf á að fjármagna stærri rannsóknir til lengri tíma.

„Það er full ástæða til að við þekkjum þessa mikilvægu fisktegund, sem við gerum ekki í dag. Við hefðum viljað sjá fjárveitingavaldið veita meiri fjármunum í bæði leit og rannsóknir þannig þekking á stofninum aukist til lengri tíma litið og hegðun stofnsins verði fyrirsjáanlegri,“ segir í frétt Austurfréttar.