þriðjudagur, 18. maí 2021
 
TölublöðVenjuleg útgáfa

Kristján Davíðsson í stjórn MSC

30. apríl 2021 kl. 09:00

Kristján Þ. Davíðsson hefur starfað innan sjávarútvegsins alla sína starfsævi og sest nú í stjórn MSC.

Kristján tekur við af Eric Barratt, fyrrverandi forstjóra sjávarútvegsfyrirtækisins Sanford á Nýja Sjálandi, en hann hefur setið í stjórn MSC síðan 2014.

Kristján Þ. Davíðsson hefur tekið sæti í stjórn Marine Stewardship Council (MSC). Kristján er stjórnarformaður Brims en hann hóf starfsferil sinn sem fiskverkamaður og sjómaður en hefur síðan gengt ýmsum störfum í sjávarútvegi og tengdum greinum. Hann hefur meðal annars starfað sem forstjóri Granda, (nú Brim), sem framkvæmdastjóri Landssambands fiskeldisstöðva , sem fulltrúi North Atlantic Seafood Forum á Íslandi og sem stjórnarformaður Corporación Pesquera Inca SA í Perú. Kristján er menntaður í sjávarútvegsfræðum frá Háskólanum í Tromsö í Noregi og hafði áður öðlast skipstjórnarréttindi við Stýrimannaskólann.

Þetta kemur fram í tilkynningu frá MSC.

Kristján tekur við af Eric Barratt, fyrrverandi forstjóra sjávarútvegsfyrirtækisins Sanford á Nýja Sjálandi, en hann hefur setið í stjórn MSC síðan 2014.

„Skipan Kristjáns í stjórnina tryggir áframhaldandi jafnvægi innan hennar milli sjávarútvegs, vísinda, frjálsra félagasamtaka, smásala og annarra sviða. Í stjórnina eru einstaklingar valdir af kostgæfni til að tryggja að ákvarðanataka mótist af jafnvægi og endurspegli ólík svið og hagsmuni,“ segir í tilkynningunni

Warner Kiene, formaður stjórnar MSC, sagði af þessu tilefni í tilkynningu MSC:

„MSC treystir á innsæi, sérþekkingu og tíma stjórnarmanna við að halda stöðu samtakanna og efla þau sem leiðandi afl í sjálfbærum veiðum og sjálfbærni sjávarafurða. Fyrir mína hönd og annarra stjórnarmanna vil ég þakka Eric Barratt fyrir hollustu hans og ómetanlegt framlag um margra ára skeið. Það er okkur mikil ánægja að bjóða Kristján Davíðsson velkominn í okkar hóp. Hann færir okkur gífurlega reynslu, umfangsmikið tengslanet í sjávarútvegi og einlægan áhuga á sjálfbærni sem verður ómetanlegt framlag í stjórninni og tryggir að við stefnumótun sína verður MSC áfram undir forystu leiðtoga með fjölbreytileg viðhorf og þekkingu.“

Rupert Howes aðalframkvæmdastjóri MSC, segir þar jafnframt:

„Ég er mjög ánægður með að Kristján taki nú annað tveggja sæta sjávarútvegs í stjórn MSC. Kristján hefur mikla reynslu og innsýn frá langri þátttöku í sjávarútvegi allt frá því að vera ungur sjómaður til núverandi starfs sem stjórnarformaður sjávarútvegsfyrirtækisins Brims. Reynsla hans spannar veiðar, tæknimál, fjármál, markaðssetningu og stjórnun, frá Suður-Ameríku til Evrópu og Asíu, allt til Kína og Japans. Kristján kemur til starfa í stjórninni þegar við byrjum að þróa nýja stefnumótun fyrir sýn okkar um heilbrigt og afkastamikið haf með sjálfbæru sjávarfangi fyrir þessa og komandi kynslóðir. Ég hlakka mikið til að vinna með honum. Ég vil líka nota tækifærið og þakka Eric Barratt innilega sem hefur lagt ómetanlegt af mörkum við þróun MSC á starfstíma sínum í stjórn okkar.“

Kristján segir það að fá að vinna með hópi fólks með þekkingu og reynslu víðsvegar að úr heiminum að bættri sjálfbærni sjávarútvegsins er tækifæri sem ég er mjög þakklátur fyrir.

„Sífellt vaxandi áhersla á sjálfbærni eflir starfið og bætir framtíð okkar allra. Það er markmið sem er svo sannarlega þess virði að vinna að.“

Gísli Gíslason, svæðisstjóri MSC í Norður Atlantshafi, segir það mjög ánægjulegt að fulltrúi frá Norður Atlantshafi taki sæti í stjórn MSC. Kristján hefur mikla alþjóða reynslu og þekkir vel til sjávarútvegs frá flestum hliðum. Hann verður því mikilvægur fulltrúi sjávarútvegsins í stjórn MSC með sín góðu tengsl í löndunum við Norður Atlantshafið.

Í stjórninni mega sitja allt að 15 meðlimir og eru ýmist án tilnefningar eða tilnefndir af tilteknum atvinnugreinum í sjávarútvegi. Eru þannig átta sæti tilnefnd af sjávarfangsframleiðendum, umhverfisverndarsamtökum, sölu- og markaðsaðilum og loks fiskifræði.