fimmtudagur, 24. júní 2021
 
TölublöðVenjuleg útgáfa

Landa síld úr grænlensku lögsögunni

2. september 2016 kl. 13:00

Polar Amaroq á Grænlandsmiðum.

Þokkalegt kropp í partrollið, segir skipstjórinn á Polar Amaroq.

Í fyrradag var lokið við að landa 645 tonnum af síldarflökum úr grænlenska skipinu Polar Amaroq en aflinn fékkst í grænlensku lögsögunni  beint norður af landinu. Halldór Jónasson skipstjóri segir að á þessum slóðum séu litlar síldarlóðningar en þrátt fyrir það kroppi menn þokkalega í partroll. Polar Amaroq er á partrollsveiðum með Polar Princess, sem landaði 900 tonnum í Hafnarfirði á sama tíma og Polar Amaroq landaði í Neskaupstað, en þetta er önnur veiðiferð skipanna á síldveiðum.

„Það gefur miklu betri árangur við þær aðstæður sem þarna ríkja að nota partrollið og síldin sem við fáum er stór og falleg. Þetta er 410 gramma síld,“ sagði Halldór.

 Um þessar mundir koma vinnsluskip nánast daglega til Neskaupstaðar og landa frystum afurðum í frystigeymslur Síldarvinnslunnar. 

Í kjölfar Polar Amaroq lönduðu Vilhelm Þorsteinsson EA og Hákon EA í frystigeymslurnar í gær og var uppistaða aflans makríll. Hákon landaði 635 tonnum og Vilhelm um 500. Síðan er von á Kristinu EA í fyrramálið og mun hún landa rúmlega 2000 tonnum af frystum makríl.

Sjá nánar á vef SVN.