miðvikudagur, 21. ágúst 2019
 
TölublöðVenjuleg útgáfa

Lausn makríldeilu ekki líkleg í þetta sinn

18. nóvember 2013 kl. 14:48

María Damanaki og Sigurður Ingi Jóhannsson

Sigurður Ingi Jóhannsson átti fund með sjávarútvegsstjóra ESB

Þessa vikuna er haldinn strandríkjafundur á Írlandi og er íslensk sendinefnd á honum. Sigurður Ingi Jóhannsson sjávarútvegsráðherra er ekki bjartsýnn á að samningar takist á þessum fundi þar sem óformlegum tvíhliða viðræðum aðila deilunnar um mögulegt samkomulag er ekki lokið. Það er þó ljóst að jákvæður andi er yfir viðræðunum og að enn er ástæða til bjartsýni á að þetta tækifæri sem nú er til samninga verði nýtt þó það takist ekki í þessari lotu, að því er segir á vef ráðuneytisins. 

Sigurður Ingi fundaði með sjávarútvegsstjóra ESB, Mariu Damanaki, á föstudaginn.  Þau ræddu stöðuna í makrílviðræðunum og samningafundinn sem hefst á Írlandi í dag. 

Ísland boðaði til fundar í makríldeilunni í september og frá þeim fundi hefur nokkuð þokast í viðræðunum. Í kjölfar ráðgjafar Alþjóðahafrannsóknaráðsins sem birt var í október og felur í sér verulega hækkun á ráðlögðum afla í makríl fyrir 2014 og betra ástand stofnsins en áður var talið, felst tækifæri til að leysa deiluna. Um það eru flestir, ef ekki allir, aðilar deilunnar sammála. 

Sigurður Ingi og Damanaki ræddu málin út frá stöðu viðræðnanna í dag, og mikilvægi þess að allir aðilar sem við borðið sitja leggi sitt af mörkum til þess að samningur takist og að makrílstofninn verði til framtíðar nýttur á sjálfbæran máta.