sunnudagur, 17. janúar 2021
 
TölublöðVenjuleg útgáfa

Leitarskip hafa lokið loðnuleit

11. janúar 2021 kl. 08:40

Loðna með landgrunnskantinum norðan Íslands allt austur að Langanesdýpi. Ekkert var að sjá á grunnum né með kantinum austan lands. Fyrirhugað er að endurtaka mælingar og þá helst þegar hagstæðar aðstæður verða m.t.t. hafíss og veðurs.

Lokið er leiðangri fimm skipa með það að markmiði að mæla stærð hrygningarstofns loðnu. Skipin hafa haldið til heimahafna. Rannsóknaskipið Árni Friðriksson var við mælingar út af Vestfjörðum en rs. Bjarni Sæmundsson leitaði og mældi á grunnslóð út af Norðurlandi. Uppsjávarskipin Aðalsteinn Jónsson, Ásgrímur Halldórsson og Polar Amaroq leituðu út af Austfjörðum, Norðausturlandi og djúpt út af norðanverðu landinu.

Alls voru um 20 sérfræðingar Hafrannsóknastofnunar um borð í skipunum auk sjómanna skipanna. Því voru um 75-80 manns sem komu beint að verkefninu á hafi úti.

Í tilkynningu Hafrannsóknastofnunar segir að það fannst loðna með landgrunnskantinum norðan Íslands allt austur að Langanesdýpi. Ekkert var að sjá á grunnum né með kantinum austan lands. Að megninu til fékkst hrygningarloðna í togsýnum. 

Hafís vestan við land hafði veruleg áhrif á mælinguna. Rannsóknaskipið Árni Friðriksson var vestast og kom ísinn alveg í veg fyrir mælingar við og utan við landgrunnsbrúnina á Vestfjarðamiðum. Þar varð vart við loðnu í desember. Eins lenti Bjarni Sæmundsson í ís norður af Vestfjörðum. Að öðru leyti voru aðstæður til mælinga með ágætum.

Fyrirhugað er að endurtaka mælingar og þá helst þegar hagstæðar aðstæður verða m.t.t. hafíss og veðurs. Rannsóknaskipin verða tilbúin í verkefnið en ekki hefur verið ákveðið hvernig þátttöku annara skipa verður háttað. Miðað við veðurspár og núverandi útbreiðslu hafíss verða góðar aðstæður til mælinga í fyrsta lagi seinni part viku.

Niðurstöður mælinganna munu liggja fyrir í vikunni.

Leiðarlínur skipanna fimm sem tóku þátt í loðnumælingum í vikunni ásamt legu hafís.