föstudagur, 14. ágúst 2020
 
TölublöðVenjuleg útgáfa

Líf að færast í vinnsluna á Seyðisfirði

Gudjon Gudmundsson
29. júlí 2020 kl. 12:12

Gullver NS, nýmálaður og fínn, mun halda til veiða nk. föstudag. Ljósm. Ómar Bogason

Gullver heldur á ný til veiða

Það sem af er júlímánuði hefur verið sumarstopp hjá frystihúsi Síldarvinnslunnar á Seyðisfirði og stoppið hefur verið nýtt til að sinna viðhaldi á húsinu og á togaranum Gullver NS.

Á heimasíðu Síldarvinnslunnar kemur fram að nú er ráðgert að Gullver haldi til veiða nk. föstudag og að vinnsla hefjist í frystihúsinu seint í næstu viku. Róbert Ingi Tómasson, framleiðslustjóri í frystihúsinu, segir að allt sé tilbúið til að hefja vinnslu á ný.

„Við höfum notað þetta hlé til að sinna viðhaldi og lagfæringum á húsinu. Hér hefur til dæmis allt verið þrifið, pússað og málað og lítur húsið virkilega vel út. Það verður allt spikk og span þegar við byrjum á ný. Hjá okkur starfar mikið af erlendu starfsfólki sem fór heim í stoppinu. Þetta fólk er nú að koma til landsins og við viljum fara afar varlega vegna kórónuveirunnar. Fólkið þarf að vera í fimm daga einangrun eftir komuna til landsins og þeirri reglu verður að sjálfsögðu fylgt. Þá munum við halda áfram því vinnufyrirkomulagi sem komið var á vegna veirunnar. Það er mjög brýnt að fara að öllu með mikilli gát í stríðinu við þessa veiru og við viljum ekki láta okkar eftir liggja í þeim efnum,“ segir Róbert.