sunnudagur, 25. ágúst 2019
 
TölublöðVenjuleg útgáfa

Ljósafellið slær aflamet

28. ágúst 2018 kl. 15:50

Mynd/Berglind

Skipið er komið yfir 5.000 tonn af veiddum afla - 46% yfir meðalafla síðustu 16 ára.

Á heimasíðu Loðnuvinnslunnar er frá því sagt að nú þegar yfirstandandi fiskveiðiár er að renna sitt skeið á enda liggur fyrir að Ljósafell SU 70 hefur slegið aflamet. Skipið er komið yfir 5.000 tonn af veiddum afla. 

Aflinn í ár er um 46% hærri en meðalafli seinustu 16 ára, segir í fréttinni. Að þessu tilefni var áhöfninni á Ljósafelli færð terta rétt áður en lagt var af stað í 51. túr ársins. 

Segir í fréttinni eftirfarandi:

„Það var létt yfir áhöfninni og masað á léttum nótum í messanum á meðan menn gæddu sér á tertunni og Ólafur Helgi Gunnarsson skipstjóri skar fyrstu sneiðina og hafði það á orði að það mætti helst ekki skera í myndina af Ljósafellinu sem prýddi tertuna. Aðspurður sagði Ólafur Helgi að megin ástæða þess hversu vel hefði gengið væru auknar fiskheimildir og stíf sjósókn. Hann sagði líka réttilega að togurum hefði fækkað þannig að færri skip væru á miðunum.  Þá lagði skipstjórinn áherslu á hversu mikilvægt það væri að hafa góða áhöfn. „Topp mannskapur“ sagði Ólafur Helgi.

Ljósafell er farsælt og gott skip. Það er orðið 44 ára gamalt með 28 ára gamla vél sem gengið hefur 170 þúsund vinnustundir og þjónar ennþá vel.  

„Við höfum aðeins einu sinni verið dregnir í land,“ sagði Ólafur Helgi kíminn, „og þá fengum við tjábol í skrúfuna.“