fimmtudagur, 24. júní 2021
 
TölublöðVenjuleg útgáfa

Lögðu grásleppunetin á fyrsta degi

16. mars 2012 kl. 08:44

Nýkomnir úr róðri. Feðgarnir Hafsteinn og Árni á bryggjunni í Grindavík. (Mynd: Vefur LS).

Fengu mjög stóra grásleppu með góðri hrognafyllingu.

Í gær var heimilt að hefja grásleppuveiðar á fimm veiðisvæðum, Faxaflóa, utanverðum Breiðafirði, Vestfjörðum, Norðurlandi frá Skagatá og austur úr og suður að Hvítingum. Hinn 1. mars var heimilt að hefja veiðar við Reykjanes sunnan Garðskaga.

Fyrstur til að nýta leyfi sitt var eins og í fyrra Hafsteinn Sæmundsson á Trylli GK frá Grindavík.  Hafsteinn landaði í dag öðru sinni og var grásleppan sem fékkst mjög stór og með góða hrognafyllingu, að því er segir á vef Landssambands smábátaeigenda.

Hafsteinn sagðist aðspurður að nokkur áhætta væri að byrja svo snemma vegna þorsksins, en það væri heldur ekki gott að bíða þar sem reynsla undanfarinna ára sýndi að besta veiðin væri fyrstu daganna.   Myndin sýnir þá feðga Hafstein og Árna í blíðunni í Grindavík, nýkomna úr róðri.

Alls höfðu 72 bátar leyfi til að leggja netin í gær og var ekki annað að heyra en flestir hefðu getað notfært sér þann rétt.