miðvikudagur, 23. september 2020
 
TölublöðVenjuleg útgáfa

Makríllinn fjarri Íslandsmiðum

27. ágúst 2020 kl. 11:40

Vísitala um magn makríls í júlí 2020. MYND/Hafrannsóknastofnun

Lífmassavísitala makríls hækkar um 7% milli ára en á hafsvæðinu við Ísland lækkar hún um 72%

Hafrannsóknastofnun hefur birt niðurstöður uppsjávarleiðangurs sumarsins. Helstu niðurstöður eru þær að „[v]ísitala lífmassa makríls var metinn 12,3 milljónir tonna sem er 7% hækkun frá árinu 2019 og er mesti lífmassi sem mælst hefur frá upphafi leiðangursins árið 2007. Mestur þéttleiki mældist í miðju- og norðanverðu Noregshafi. Á hafsvæðinu við Ísland mældist 72% minna af makríl en 2019. Mestur var þéttleikinn suðaustan við landið, ólíkt undanförnum árum þegar mestur þéttleiki mældist sunnan og vestan við landið."

Magn norsk-íslenskrar síldar jókst einnig. Vísitala lífmassa hans var metin 5,9 milljónir tonna sem er 24% hækkun frá 2019.

„Þessi auking skýrist af stórum 2016 árgangi sem er að öllum líkindum að stærstu leyti genginn nú úr Barentshafi inn í Noregshaf. Þessi árgangur ásamt þeim frá 2013, vógu um 55% af lífmassa stofnsins. 

Þá segir að útbreiðsla síldarstofnsins hafi verið svipuð og undanfarin ár. 

„Eldri hluti hans var í mestum þéttleika norður af Færeyjum, fyrir austan og norðan Íslands, en yngri síldin í norðaustur Noregshafi".

Ennfremur var fimmta árið í röð lögð áhersla á að ná yfir allt útbreiðslusvæði kolmunna og að meta stærð stofnsins. 

„Vísitala stofnstærðar var 1,8 milljónir tonna sem er 11% lækkun frá 2019. Kolmunni fannst á mest öllu rannsóknarsvæðinu nema í köldum sjó við Austur-Grænland og í Austur Íslandsstraumnum milli Íslands og Jan Mayen, og fyrir vestan og sunnan Ísland. Við Ísland mældist mest af kolmunna suðaustan og austan við landið og ólíkt fyrri árum varð ekki vart við kolmunna við landgrunnsbrúnina sunnan við landið.

Uppsjávarleiðangurinn er árlegt og sameiginlegt verkefni Íslendinga, Grænlendinga, Færeyinga, Norðmanna og Dana. Meginmarkmiðið er að meta magn uppsjávarfiska í Norðaustur-Atlantshafi að sumarlagi.

Frekar má lesa um niðurstöður leiðangursins á vef Hafrannsóknastofnunar og ítarlega skýrslu er að finna hér.