þriðjudagur, 19. nóvember 2019
 
TölublöðVenjuleg útgáfa

Makríllinn upp en síldin niður

1. október 2019 kl. 13:39

Ný ráðgjöf um aflamark uppsjávarstofna á Norður-Atlantshafi komin frá ICES

Alþjóðahafrannsóknaráðið (ICES) leggur til að makrílafli ársins verði ekki meiri en 922 þúsund tonn. Ráðgjöf yfirstandandi árs var 770 þúsund tonn og er því um að ræða tæplega 20% aukningu í tillögum ráðsins um afla næsta árs. 

ICES áætlar er að heildarafli ársins 2019 verði um 835 þúsund tonn, rúm 9% umfram ráðgjöf.

Hafrannsóknastofnun greinir frá þessu í tilkynningu.

Ráðgjöfin í makríl er í samræmi við nýtingarstefnu sem á að leiða til hámarks afraksturs til lengri tíma litið (MSY). 

Reikna með ofveiði
Varðandi norsk-íslensku vorgotssíldina leggur ICES til í samræmi við samþykkta aflareglu strandríkja að afli ársins 2020 verði ekki meiri en 526 þúsund tonn. Ráðgjöf yfirstandandi árs var 589 þúsund tonn og er því um að ræða 11% lækkun í tillögum ráðsins um afla næsta árs.

Ástæða þess er fyrst og fremst að stofninn er enn á niðurleið eftir slaka nýliðun um árabil. Áætlað er að heildarafli ársins 2019 verði um 774 þúsund tonn sem er 31% umfram ráðgjöf.

Þá leggur ICES til, í samræmi við langtímanýtingarstefnu, að afli ársins 2020 verði ekki meiri en 1,161 milljón tonn. Ráðgjöf fyrir árið 2019 var mjög svipuð eða 1,14 milljón tonn en gert er ráð fyrir að aflinn á árinu verði um 1,44 milljón tonn, 26% umfram ráðgjöf.