sunnudagur, 19. september 2021
 
TölublöðVenjuleg útgáfa

Makríllinn víkur fyrir síld

9. september 2021 kl. 11:11

Vilhelm Þorsteinsson EA kom með 1.120 tonn af síld til Neskaupstaðar í morgun. Mynd/Smári Geirsson

Skipin sem landað hafa makríl hjá Síldarvinnslunni ætla nú að einbeita sér að síldveiðum. Horfur eru góðar og stutt að fara.

Skipin sem landað hafa makríl hjá Síldarvinnslunni eru hætt að eltast við hann að sinni enda hefur mjög dregið úr veiðinni að undanförnu. Það er síldin sem er næst á dagskrá. Börkur NK landaði 400 tonnum af síld í Neskaupstað í byrjun vikunnar og í morgun kom Vilhelm Þorsteinsson EA þangað með 1.120 tonn. 

Heimasíða Síldarvinnslunnar segir frá og ræddi stuttlega við Birki Hreinsson, skipstjóra á Vilhelm, og spurði fyrst hvar síldin hefði veiðst. 

„Við fengum þessa síld á Héraðsflóanum í þremur fjögurra og hálfs tíma holum. Þetta er eðalsíld, langmest norsk-íslensk en eitthvað svolítið af íslenskri sumargotssíld í bland. Það er alltaf gaman að veiða síld þegar nóg er af henni. Það er þægilegt að þurfa ekki að sækja hana langt eins og makrílinn. Annars rættist vel úr makrílvertíðinni miðað við hvernig hún leit út í upphafi,“ segir Birkir.