þriðjudagur, 15. júní 2021
 
TölublöðVenjuleg útgáfa

Makrílveiðin glæðist á ný fyrir austan land

16. september 2016 kl. 12:19

Börkur NK. (Mynd: Hákon Ernuson)

Öll skipin á miðunum fengu góðan afla í gær en þar á undan var um tíma ekki mikið að hafa.

Börkur NK kom til Neskaupstaðar í nótt með 840 tonn af makríl. „Við fengum aflann í fjórum holum í kantinum utan við Gerpistotu, um 50 mílur út af Gerpi," segir Hjörvar Hjálmarsson skipstjóri í samtali á vef Síldarvinnslunnar.

"Þetta er góður makríll og það var mikið að sjá í gær. Fiskurinn er um 460 grömm að meðaltali. Makríllinn gengur í norður og fer hratt. Öll skip á miðunum fengu góðan afla í gær en fyrir þessa hrotu hafði ekki verið mikið að hafa um tíma. Aflinn hjá okkur er ekkert síldarblandaður enda toguðum við yfir daginn og þá heldur síldin sig niðri,“ sagði Hjörvar.

Lokið var við að landa 500 tonnum af makríl úr Beiti NK í Neskaupstað í gær. Allur aflinn fór til vinnslu í fiskiðjuverinu en makrílinn var töluvert síldarblandaður. Í kjölfar Beitis hófst löndun úr Bjarna Ólafssyni AK en hann er með 600 tonn.

Eins og fram hefur komið í Fiskifréttum hefur makríllinn haldið sig lengur inni í íslensku lögsögunni í ár en fyrra. Í september á síðasta ári  voru skipin að elta hann í Síldarsmugunni. Samkvæmt tölum Fiskistofu er nú búið að tilkynna um 125.000 tonna afla af 166.000 tonna kvóta. Vitað er að aflinn er talsvert meiri í raun því alltaf er þó nokkur afli  "í pípunum".