sunnudagur, 13. júní 2021
 
TölublöðVenjuleg útgáfa

Makrílvinnslan að hefjast hjá Síldarvinnslunni

26. júlí 2018 kl. 12:20

Beitir NK landar í Neskaupstað. Mynd Hákon Ernuson.

Beitir NK heldur til veiða um helgina.

Beitir NK kom til Neskaupstaðar síðastliðna nótt með 1.450 tonn af kolmunna, eins og kemur fram á heimasíðu Síldarvinnslunnar. Þar segir að þegar löndun er lokið mun skipið verða þrifið hátt og lágt og síðan mun það halda til makrílveiða um helgina.

Ráðgert er að hefja makrílvinnslu í fiskiðjuveri Síldarvinnslunnar í byrjun næstu viku. Unnið verður á tveimur vöktum í verinu. Vonast er til að allt verði farið að ganga vel við framleiðsluna í lok næstu viku en síðan verður starfsfólki gefið frí um verslunarmannahelgina.

Vilhelm Þorsteinsson EA landaði fullfermi af frystum makríl í Neskaupstað í gær og er þetta önnur veiðiferðin eftir að skipið hóf veiðarnar.

Börkur NK og Bjarni Ólafsson AK eru enn við kolmunnaveiðar og hafa veiðarnar gengið vel að undanförnu. Áformað er að Börkur landi í fyrramálið og haldi síðan til makrílveiða, segir í fréttinni.