sunnudagur, 25. ágúst 2019
 
TölublöðVenjuleg útgáfa

Marsrallið hafið

2. mars 2015 kl. 09:41

Úr togararalli. (Mynd: Guðm. Bjarnason)

Tvö rannsóknaskip og tveir togarar sinna verkefninu.

Stofnmæling botnfiska á Íslandsmiðum, svo kallað marsrall, hófst í vikunni sem leið og stendur yfir næstu þrjár vikurnar. Fjögur skip taka þátt í verkefninu að þessu sinni; togararnir Ljósafell SU og Bjartur NK og rannsóknaskipin Árni Friðriksson og Bjarni Sæmundsson. Alls verður togað á um 600 stöðvum á 20-500 m dýpi umhverfis landið eins og sjá má á þessari mynd.

Marsrallið hefur verið framkvæmt með sambærilegum hætti á hverju ári síðan 1985. Helstu markmið eru að fylgjast með breytingum á stofnstærðum, aldurssamsetningu, fæðu, ástandi og útbreiðslu botnfisktegunda við landið. Einnig er safnað sýnum vegna ýmissa rannsókna, t.d. á mengandi efnum í sjávarfangi. Helmingur togstöðva var í upphafi staðsettur af reyndum skipstjórum en öðrum stöðvum var dreift um miðin með tilviljunarkenndum hætti. Undanfarin ár hafa skipstjórar einnig sett út aukastöðvar þar sem von er um þorsk í útköntum, aðallega fyrir norðvestan og norðaustan land.

Úrvinnsla mælinganna og aldursgreiningar fara fram í lok mars og helstu niðurstöður verða kynntar í apríl. 

Fylgjast má með ferðum rallskipanna hér