þriðjudagur, 10. desember 2019
 
TölublöðVenjuleg útgáfa

Með 170 tonn eftir fjóra sólarhringa

8. ágúst 2019 kl. 09:30

Akurey AK. Mynd/Brim

Engan þorsk að hafa á þekktri veiðislóð á Vestfjarðamiðum, s.s. á Halanum.

Ísfisktogarinn Akurey AK kom til hafnar á Sauðárkróki síðdegis í gær með um 170 tonna afla eftir um fjóra sólarhringa á veiðum en látið var úr höfn í Reykjavík sl. föstudag.

Frá aflabrögðum Akureyjar segir á heimasíðu HB Granda.

„Við höfum verið að þorskveiðum fyrir norðan land seinni partinn í sumar og aflabrögðin hafa verið góð,“ segir Magnús Kristjánsson í fréttinni, en hann var skipstjóri í veiðiferðinni. Magnús segir að þorskurinn hafi greinilega leitað lengra norður en vant er í ætisleit og nú sé t.a.m. engan þorsk að hafa á þekktri veiðislóð á Vestfjarðamiðum, s.s. á Halanum og í kantinum þar suðvestur af. Skip sem nú eru á Vestfjarðamiðum séu þar að eltast við ufsa.

„Hér úti fyrir Norðurlandi höfum við fengið góðan þorskafla og í þessari veiðiferð fórum við lengst austur á Sléttugrunn. Við höfum orðið varir við töluvert æti s.s. makríl, síld og rækju. Loðna hefur ekki sést. Auk þorsksins er hér einnig dálítið af ufsa en karfann verðum við að veiða vestan og suðvestan við landið,“ segir Magnús.