fimmtudagur, 19. september 2019
 
TölublöðVenjuleg útgáfa

Tvöfalt meiri makríll til manneldis

14. september 2011 kl. 15:17

Makríll á færibandi hjá HB Granda á Vopnafirði. (Mynd á vef HB Granda/ Jón Sigurðarson).

HB Grandi hefur fryst 11.000 tonn af makríl á Vopnafirði í ár.

Vinnsla og frysting á makrílafurðum til manneldis hjá uppsjávarfrystihúsi HB Granda á Vopnafirði hefur meira en tvöfaldast nú á vertíðinni í samanburði við vertíðina í fyrra. Búið er að frysta alls tæplega 11.000 tonn af makrílafurðum á Vopnafirði en alla vertíðina í fyrra nam magnið tæplega 5.000 tonnum.

Magnús Róbertsson, vinnslustjóri HB Granda á Vopnafirði, er mjög ánægður með ganginn í vinnslunni í sumar og hann segir að allt hafi gengið hnökralaust fyrir sig.

,,Líkt og ég hef nefnt áður þá skipti það sköpum fyrir okkur við makrílvinnsluna að fá nýja blásturfrystinn fyrir vertíðina og sú fjárfesting hefur svo sannlega skilað sér í sumar,“ segir Magnús í samtali á vef HB Granda, ,,en án blástursfrystisins hefði ekki verið hægt að vinna stærsta makrílinn til manneldis. Kemur þar hvort tveggja til að flökunarvélarnar ráða illa við stærsta fiskinn og hann er sömuleiðis of stór fyrir pönnurnar sem afurðirnar eru settar í áður en þær fara í frystingu í plötufrystum.

Alls er búið að frysta rúmlega 15.000 tonn af síldar- og makrílafurðum hjá HB Granda á Vopnafirði í sumar og í haust. Áhersla var lögð á makrílveiðar í sumar en nú eru skipin að síldveiðum og mikið af stórri og góðri síld hefur borist vinnslunni undanfarna daga.