miðvikudagur, 1. apríl 2020
 
TölublöðVenjuleg útgáfa

Nemendum veittir námsstyrkir

6. mars 2020 kl. 09:15

Marianne Rasmussen-Coulling og Ólafur Jón Arnbjörnsson ásamt handhöfum styrkjanna í ár; þeim Eydísi Gróu Jónsdóttur og Kristófers Más Gunnarssonar

Tilkynnt var í gær hverjir hlytu námsstyrki Íslensku sjávarútvegssýningarinnar, IceFish 2020, sem fer fram 23. til 25. September næstkomandi. Tveir nemendur við Fisktækniskóla Íslands hljóta styrkinn að þessu sinni, 500 þúsund krónur hvor.

Tilkynnt var í gær hverjir hlytu námsstyrki Íslensku sjávarútvegssýningarinnar, IceFish 2020, sem fer fram 23. til 25. September næstkomandi. Tveir nemendur við Fisktækniskóla Íslands hljóta styrkinn að þessu sinni, 500 þúsund krónur hvor.

Í kjölfar Íslensku sjávarútvegssýningarinnar 2014 gerðu forsvarsmenn hennar sér grein fyrir mikilvægi þess að fjárfesta í framtíð sjávarútvegarins og komu á fót menntastyrkjum til handa þeim sem stunda nám á sviði sjávarútvegs. Fyrstu menntastyrkirnir voru veittir árið 2017 og hafa þeir verið veittir tvisvar á ári allar götur síðan.

Marianne Rasmussen-Coulling, framkvæmdastjóri Íslensku sjávarútvegssýningarinnar fyrir hönd eiganda sýningarinnar, Mercator Media, kynnti styrkþegana tvo, en þeir stunda báðir nám við Fisktækniskóla Íslands í Grindavík. Menntastyrkina í ár hljóta þau Eydís Gróa Jónsdóttir, sem er að læra gæðastjórnun í sjávarútvegi, og Kristófer Már Gunnarsson, sem er að læra fiskeldi.  

Marianne Rasmussen-Coulling, framkvæmdastjóri IceFish 2020, segir að atvinnugreinin sé afar mikilvæg fyrir ekki Ísland eingöngu, heldur heiminn allan.

„Það skiptir sköpum að mennta ungt fólk í greininni og hvetja yngri kynslóðir til að halda áfram árangurríkum og sjálfbærum fiskveiðum í atvinnuskyni, fiskeldi, framleiðslu sjávarrétta og virðisaukandi greinum sjávarútvegs. Mercator þykir heiður að geta lagt sitt lóð á vogarskálarnar með veitingu þessara árlegu styrkja.”

Átta nemendur styrktir

Til þessa hefur Íslenska sjávarútvegssýningin styrkt alls átta nemendur við Fisktækniskóla Íslands á seinustu misserum með veglegum hætti.

„Ég get ekki ítrekað of oft hversu mikilvægir styrkirnir eru fyrir þessa nemendur, en einnig hversu dýrmætir þeir eru til að styðja við námsframboð skólans í sjávarútvegsgeiranum og veita viðurkenningu starfinu sem þar fer fram,“ segir Ólafur Jón Arnbjörnsson, skólastjóri Fisktækniskóla Íslands. „Ég vil þakka Íslensku sjávarútvegssýningunni fyrir rausnarlegt framlag hennar og fyrir að beina sjónum að vægi kunnáttu og færni og hversu stórt hlutverk grunnþjálfun og grunnmenntun gegnir fyrir sjávarútveginn. Það er þáttur sem stundum er litið framhjá en hefur margsannað gildi sitt fyrir framþróun í atvinnugreininni.“ 

Eydísi Gróa Jónsdóttir, annar handhafi menntastyrks IceFish í ár, segir styrkinn afar mikilvægan fyrir sig.

„Hann gerir mér kleift að klára Fisktækniskólann og komast lengra í lífinu. Styrkurinn auðveldar mér námið og hefur efnahagslega þýðingu fyrir mig, þannig að ég er afskaplega þakklát fyrir að hafa hlotið hann.“

Kristófer Már Gunnarsson, sem jafnframt fékk styrkinn í ár, segir hann mikla hvatningu og hafa talsvert að segja fyrir sitt nám.

„Ég stunda nám í bæði gæðastjórnun og fiskeldi og styrkurinn dekkar nánast öll skólagjöld og bætir upp það vinnutap sem maður verður óneitanlega fyrir því samfara. Ég er því ákaflega ánægður með að Íslenska sjávarútvegssýningin hafi valið að styrkja efnilega nemendur með þessum hætti og ábyrgist að hann nýtist vel. Ég er einnig þakklátur fyrir það traust sem nefndarmenn bera til mín.“

Dómnefnd verðlaunanna var skipuð sérfræðingum í sjávarútvegi, en í henni sátu: Ólafur Jón Arnbjörnsson, skólastjóri Fisktækniskóla Íslands, Sigurjón Elíasson, fræðslu- og þróunarstjóri á alþjóðasviði Marel, Guðbergur Rúnarsson, verkfræðingur og framkvæmdastjóri Samtaka fiskvinnslustöðva, Örn Pálsson, framkvæmdastjóri Landssambands smábátaeiganda, og Bjarni Þór Jónsson, fulltrúi Mercator/Íslensku sjávarútvegssýningarinnar á Íslandi.

Í tilkynningu kemur fram að Fisktækniskóli Íslands, sem stofnaður var í Grindavík 2010, hefur það markmið uppfylla kröfur sjávarútvegsfyrirtækja í veiðum, vinnslu og fiskeldi með því að mennta og þjálfa hæft starfsfólk. Skólinn býður þjálfun fyrir starfsfólk fyrirtækja á bæði sjó og landi á sviði fiskvinnslu og fiskeldis.

Fisktækniskóli Íslands býður líka samningsbundið iðnnám í netagerð í samstarfi við Fjölbrautaskóla Suðurnesja. Upphaflegar námsbrautir skólans hafa verið auknar í því skyni að innihalda margþættari og sérhæfðari námsgreinar, þar á meðal í gæðastjórnun, fiskvinnslu og fiskeldi, og er IceFish-námssjóðnum einkum ætlað að styrkja nema til slíks framhaldsnáms.