föstudagur, 14. ágúst 2020
 
TölublöðVenjuleg útgáfa

Minna af makríl við Ísland

29. júlí 2020 kl. 11:08

Síðasta togið. MYND/Hafrannsóknastofnun, Svanhildur Egilsdóttir

Rannsóknaskipið Árni Friðriksson er nú á heimleið eftir að hafa lokið þátttöku í árlegum uppsjávarvistkerfisleiðangri

Bráðabirgðaniðurstöður úr árlegum uppsjávararleiðangri að sumri sýna að magn makríls í íslenskri landhelgi er mun minna en verið hefur undanfarin ár. Minna mlældist einnig af kolmunna en magn síldar er álíka og undanfarin ár.

Hafrannsóknastofnun greinir frá þessu.

Rannsóknaskipið Árni Friðriksson er nú á heimleið eftir að hafa lokið þátttöku í árlegum uppsjávarvistkerfisleiðangri í Norðurhöfum að sumarlagi (IESSNS, International Ecosystem Summer Survey in the Nordic Seas) sem hófst 1. júlí.

Árni rannsakaði útbreiðslu og þéttleika makríls, síldar og kolmunna í íslenskri landhelgi fyrir norðan, norðaustan og sunna landið meðan að Færeyingar dekkuðu íslensku lögsöguna fyrir austan land og Grænlendingar fyrir vestan (eru ennþá við rannsóknir).

Í leiðangri Árna kringum landið hafa verið teknar 65 togstöðvar og sigldar um 5400 sjómílur eða 10 þúsund km. Þá voru gerðar sjómælingar og teknir átuháfar á flestum togstöðvunum. Auk mælinga á magni makríls, kolmunna og síldar voru í leiðangrinum einnig merkt alls 403 hrognkelsi.

Þá greinir Hafrannsóknastofnun frá því að auk rannsókna á uppsjávarvistkerfinu hafi umfangsmikil sýnasöfnun verið úr miðsjávarlögum hafsins suður af Íslandi fyrir tvö alþjóðleg rannsóknaverkefni sem Hafrannsóknastofnun tekur þátt í, SUMMER (https://summerh2020.eu/) og MEESO (https://www.meeso.org/).

„Það eru bundnar vonir við það að þessi verkefni eigi eftir að skila nýrri og mikilsverðri þekkingu á miðsjávarlífríki Íslandsdjúps og Irminger hafs,“ segir í tilkynningunni.