föstudagur, 17. janúar 2020
 
TölublöðVenjuleg útgáfa

Mokveiði á Fjöllunum og víðar

29. apríl 2014 kl. 08:57

Sturlaugur H. Böðvarsson AK (Mynd: Þorgeir Baldursson)

Sturlaugur H. Böðvarsson AK landar 130 tonnum eftir fjögurra sólarhringa úthald.

Ísfisktogarinn Sturlaugur H. Böðvarsson AK kom til hafnar í Reykjavík um hádegisbilið í dag með alls tæplega 130 tonna afla eftir rétt rúmlega fjögurra sólarhringa úthald. Að sögn skipstjórans, Eiríks Jónssonar, er ekki hægt að kvarta yfir aflabrögðunum.

,,Við fórum út aðfararnótt sl. fimmtudags og byrjuðum á karfaveiðum á Fjöllunum eða á hinum hefðbundnu karfamiðum okkar. Þar var mokveiði og aflinn var um 50 tonn af stórum og góðum gullkarfa eftir rúmlega sex tíma á veiðum. Þar með vorum við komnir með karfaskammtinn okkar og því var farið norður á Vestfjarðamið og lengst fórum við að Þverálshorni,“ segir Eiríkur í viðtali á heimasíðu HB Granda en að hans sögn byrjaði veiðin frekar rólega á Vestfjarðamiðum.

,,Síðan bætti bara í og á þeim sólarhring sem við vorum að veiðum fengust rúmlega 40 tonn af þorski og einhver meðafli eins og gengur. Við vorum svo á leiðinni til hafnar þegar fréttir bárust af því að ufsi væri að veiðast með karfa í Víkurálnum og þar sem við vorum ekki langt undan þá lögðum við lykkju á leið okkar og tókum þrjú stutt hol. Í þeim fengust um 15 til 20 tonn af karfa og ufsa,“ sagði Eiríkur Jónsson.