fimmtudagur, 19. september 2019
 
TölublöðVenjuleg útgáfa

Næsta loðnuvertíð gæti skilað 20-30 milljörðum króna

8. september 2011 kl. 11:23

Loðna í lófa

180 þúsund tonna upphafsheimild í loðnu gefin út.

Sjávarútvegsráðherra gaf í dag út heimild til íslenska loðnuveiðiskipa á komandi loðnuvertíð til veiða á 181.269 tonnum af loðnu. Tekið er mið af tilmælum Hafrannsóknastofnunarinnar þegar aflaheimildir íslenskra skipa eru reiknaðar út frá helmingi af ráðlögðum upphafskvóta vertíðarinnar sem er 732.000 lestir.

 Einnig ráðlagði Hafrannsóknarstofnunin að sumarveiðar á loðnu yrðu ekki leyfðar. Með þetta að leiðarljósi var ákveðið að loðnuveiðar í íslenskri fiskveiðilögsögu standi frá 1. október 2011 til 30. apríl 2012. Einungis skip sem hafa aflamark í loðnu geta stundað veiðarnar.

 Á síðasta vetri námu loðnuheimildir innan lögsögunnar samtals 325 þúsund tonnum en þar af fóru um 73 þúsund tonn til erlendra skipa samkvæmt milliríkjasamningum. Í frétt frá sjávarútvegsráðneytinu segir að miðað við þær forsendur sem nú liggi fyrir sé líklegt að hluti íslenskra skipa af heildinni verði um hálf milljón tonna.

 Ennfremur segir: ,,Varlega áætlað og miðað við hagstæða samsetningu í bræðslu aflans, frystingar og hrognavinnslu má reikna með að heildarverðmæti úr sjó verði 20 til 30 milljarðar króna.”