fimmtudagur, 13. ágúst 2020
 
TölublöðVenjuleg útgáfa

Nóg að toga í hálfa til eina klukkustund

22. apríl 2014 kl. 12:33

Skipverjar á Bjarti NK í aðgerð. (Mynd: Þorgeir Baldursson).

Gæta þarf þess að þorskholin verði ekki of stór, segir skipstjórinn á Bjarti NK

Ísfisktogarinn Bjartur NK kom til Neskaupstaðar í gær með 97 tonn af blönduðum afla. Um 50 tonn af aflanum var þorskur, 22 tonn ufsi og um 17 tonn karfi.

Að sögn Steinþórs Hálfdanarsonar skipstjóra gekk veiðiferðin vel.

„Nú gekk okkur mun betur að veiða ufsa en í síðasta túr, en þá var erfitt að ná honum. Töluvert þurfti að hafa fyrir því að ná karfanum en eins og oft áður var ekkert vandamál að fá þorsk. Það þarf að gæta þess að þorskholin verði ekki alltof stór og því toguðum við einungis í hálfa til eina klukkustund hverju sinni eftir að við fórum í þorskveiðina. Við tókum þorskinn á Breiðdalsgrunni en ufsann og karfann í Berufjarðarál og í Hvalbakshalli,“ segir Steinþór í samtali á heimasíðu Síldarvinnslunnar.