föstudagur, 18. júní 2021
 
TölublöðVenjuleg útgáfa

,,Nú er mál að linni"

29. mars 2012 kl. 17:57

Í aðgerð um borð í togara (Mynd: Þorgeir Baldursson).

LÍÚ skorar á ríkisstjórnina að draga fiskveiðifrumvörpin til baka.

Á fundi stjórnar Landssambands íslenskra útvegsmanna (LÍÚ)  sem haldinn var í dag var fjallað um frumvörp til laga um stjórn fiskveiða og veiðigjöld. LÍÚ  átelur harðlega vinnubrögð við gerð frumvarpanna þar sem ekkert samráð hafi verið haft við atvinnugreinina. Verði þau að lögum muni þau hafa grafalvarleg áhrif á íslenskan sjávarútveg og íslenskt samfélag.

,,Áform um að skerða aflaheimildir og gera stærstan hluta afkomu fyrirtækjanna upptækan kollvarpa rekstri þeirra og fjölmörg þeirra verða gjaldþrota. Áhrif á tengdar greinar og þau byggðarlög sem byggja afkomu sína á sjávarútvegi verða einnig alvarleg. Með því að draga máttinn úr íslenskum sjávarútvegi er vegið að lífskjörum sjómanna, fiskverkafólks og landsmanna allra,“ segir í ályktun fundarins.

Ennfremur segir: ,,Útvegsmenn hafa óskað eftir aðkomu að endurskoðun laga um stjórn fiskveiða allt frá því að ríkisstjórnin komst til valda.  Endurtekin frumvörp ríkisstjórnarinnar sem samin hafa verið án aðkomu greinarinnar hafa öll verið ónothæf. Nú er mál að linni.

Stjórn LÍÚ skorar á ríkisstjórnina að draga frumvörpin til baka og vinna þau faglega með þátttöku atvinnugreinarinnar. Útvegsmenn óska eftir að skipaður verði starfshópur sérfræðinga með fulltrúum stjórnvalda og útgerðarmanna til að meta þjóðhagsleg áhrif frumvarpanna, áhrif þeirra á atvinnugreinina, starfsfólk og sveitarfélögin.“