mánudagur, 27. janúar 2020
 
TölublöðVenjuleg útgáfa

Nýr Börkur afhentur í janúar 2021

8. janúar 2020 kl. 13:11

Miðskipseining, lestareining, í smíðum. Mynd/Hörður Erlendsson

Fyrir nokkru hófst smíði hins nýja Barkar í Gdynia og hafa fulltrúar Síldarvinnslunnar heimsótt stöðina þar og fræðst um hvernig að smíðinni er staðið.

Gert er ráð fyrir að nýr Börkur verði afhentur Síldarvinnslunni í janúarmánuði 2021. 

Þetta kemur fram á vef Síldarvinnslunnar í Neskaupstað.

Þar segir:

Það er Skipasmíðastöðin Karstensens í Skagen í Danmörku sem annast smíði hins nýja Barkar en Börkur verður systurskip Vilhelms Þorsteinssonar sem einnig er í smíðum hjá stöðinni og mun væntanlega verða afhentur eiganda sínum í ágústmánuði.

Skipasmíðastöð Karstensens hefur starfsstöðvar í Póllandi og þar er efnað niður í skipin og skrokkar þeirra smíðaðir. Síðan eru skrokkarnir dregnir til Skagen og þar er smíði skipanna lokið. Fyrir nokkru hófst smíði hins nýja Barkar í Gdynia og hafa fulltrúar Síldarvinnslunnar heimsótt stöðina þar og fræðst um hvernig að smíðinni er staðið. Í stöðinni er allt efni í skipið sniðið niður með hjálp tölvutækni og síðan vinnur mikill fjöldi manna við að setja einingarnar saman.

Dæmigert uppsjávarskip

Nýr Börkur er smíðaður með flotvörpu- og hringnótaveiðar í huga þannig að hann verður dæmigert uppsjávarveiðiskip. Mun hann leysa af hólmi núverandi Börk sem smíðaður var í Tyrklandi árið 2012. Nýi Börkur verður 88 metrar að lengd, 16,6 metrar að breidd og 9,6 metrar að dýpt. Stærð skipsins verður 4.100 brúttótonn. Aðalvélar í skipinu verða tvær, 3.200 hestöfl hvor, en einnig verður í því 820 kw ásrafall. Rafall skipsins verður 3.500 kw og í því verða tvö kælikerfi, 1.500 kw hvort, til að kæla aflann. Kælitankar verða 13 talsins, alls 3.420 rúmmetrar. Í skipinu verða vistarverur fyrir 16 manns.

Knud Degn Karstensen, framkvæmdastjóri skipasmíðastöðvarinnar, segir að lengi hafi verið áhugi fyrir því hjá forsvarsmönnum hennar að smíða fiskiskip fyrir Íslendinga. Einungis eitt skip hafi verið smíðað hjá stöðinni fyrir íslenskt fyrirtæki áður en smíði Vilhelms Þorsteinssonar og Barkar hófst en það var Þórunn Sveinsdóttir VE. Annars hafa umsvif Skipasmíðastöðvar Karstensens verið mikil á síðustu árum og frá árinu 2007 hefur stöðin lokið smíði á milli 40 og 50 skipa af ýmsum gerðum. Er þar um að ræða fiskiskip, herskip og rannsóknaskip. Síðustu árin hefur stöðin afhent 5-6 nýsmíðuð skip árlega ásamt því að sinna viðhaldi og breytingum á fjölmörgum skipum.