mánudagur, 20. janúar 2020
 
TölublöðVenjuleg útgáfa

Nýtt glæsilegt fiskvinnsluhús ÚA

15. janúar 2016 kl. 11:26

Úr nýja fiskvinnsluhúsinu. (Mynd af vef Samherja).

Sjálfvirkar pökkunarlínur og nýjasti tækjabúnaður.

Í nóvember sl. hófst starfssemi í nýju og glæsilegu húsnæði Útgerðarfélags Akureyringa. Eitt ár leið frá því ákveðið var að rífa gamla bragga og reisa hið nýja húsnæði, þar til það var tilbúið til notkunar.  

„Nýja húsnæðið er mjög góð viðbót við vinnsluna hér. Húsnæðið er hannað til að mæta ýtrustu kröfum fyrir framtíðar fiskvinnslu. Það er hátt til lofts og vítt til veggja.  Í húsinu eru nýjar sjálfvirkar pökkunarlínur fyrir bæði ferskar og frosnar afurðir auk hitastýrðs afgreiðslurýmis sem bættir vörumeðhöndlun til muna. Það er mikið af nýjum tækjabúnaði sem tekur tíma að stilla saman og læra á, en starfsfólkið hefur verið mjög jákvætt og ákveðið í að láta hlutina ganga," segir Gestur Geirsson, framkvæmdastjóri landvinnslu Samherja á vef fyrirtækisins. 

„Með þessari nýju byggingu, samhliða breytingum á vinnslunni, förum við í stórum skrefum inn í breytta framtíð þar sem möguleikar okkar til að þjóna viðskiptavinum okkar með fjölbreyttari afurðir eru orðnir mun meiri en áður,“ segir Þorsteinn Már Baldvinsson forstjóri Samherja. „Eitt af markmiðum þessara breytinga var að fækka störfum sem eru líkamlega erfið og auka öryggi og velferð starfsfólksins sem hjá okkur vinnur. Það er mat okkar að vel hafi tekist til. Með þessum breytingum höldum við áfram að vera í forystu í fiskveiðum og vinnslu á hvítfiski, ekki bara á Íslandi heldur í heiminum.“ 

Hjá ÚA starfa um150 manns og mikil verðmætasköpun á sér stað í fiskvinnslunni.

Sjá nánar frásögn, myndir og myndband á vef Samherja.