laugardagur, 21. september 2019
 
TölublöðVenjuleg útgáfa

Ófullnægjandi eftirlit með framleiðslu fiskafurða á Íslandi

8. febrúar 2011 kl. 11:16

Fiskvinnsla

Þetta er meginniðurstaða skýrslu Eftirlitsstofnunar EFTA (ESA) sem gefin var út í dag.

Íslensk yfirvöld gátu ekki tryggt að fiskafurðir væru meðhöndlaðar og unnar samkvæmt skilyrðum EES-samningsins í skoðunarferð á Íslandi í nóvember 2010. Þetta er meginniðurstaða skýrslu Eftirlitsstofnunar EFTA (ESA) sem gefin var út í dag.

Skýrslan var unnin í kjölfar reglubundinar skoðunarferðar sem farin var til Íslands í nóvember 2010 og sneri að opinberu eftirliti með fiskafurðum.

Meginniðurstaða skýrslunnar er að eftirlit með fiskafurðum á Íslandi var ófullnægjandi þegar skoðunarferðin átti sér stað.

Helstu athugasemdir skoðunarmanna ESA sneru að eftirfarandi:

Sjálfstæðar skoðunarstofur sinntu eftirliti í vinnslustöðvum en tilkynntu ekki alla annmarka til lögbærra yfirvalda eins og þeim ber að gera. Þar af leiðandi vissu lögbær yfirvöld ekki af annmörkum í vinnslustöðvum í öllum tilvikum.

Skoðunarstofurnar geta ekki talist óhlutdrægar þar sem þær fengu greitt fyrir eftirlitið beint frá eftirlitsþeganum (vinnslustöðvunum).

Fjöldi skoðunar- og eftirlitsferða sem farnar voru og fjöldi sýna sem tekin voru af lögbærum yfirvöldum var ekki í samræmi við skilyrði EES-samningsins.

Skoðunarmenn ESA gerðu einnig athugasemdir við að ekki var í öllum tilvikum gripið til viðeigandi ráðstafana til að tryggja að farið væri að lögum þegar þess var þörf.

Einnig gerðu eftirlitsmenn ESA athugasemdir við hreinlæti, aðstöðu, verklag og innra eftirlit vinnslustöðva sem heimsóttar voru.

Íslensk yfirvöld hafa lagt fram framkvæmdaáætlun um úrbætur í samræmi við niðurstöður skýrslunnar. Framkvæmdaáætlunin er birt sem viðhengi með skýrslunni. ESA mun fylgjast náið með framkvæmd áætlunarinnar.

Sjá nánar HÉR