þriðjudagur, 15. júní 2021
 
TölublöðVenjuleg útgáfa

Örlítil aukning kvótans

2. september 2016 kl. 09:24

Netaveiðar (Mynd: Einar Ásgeirsson)

Óbreytt röð hæstu fyrirtækja. HB Grandi með 10,3% af heildinni

Fiskistofa hefur úthlutað aflamarki fyrir fiskveiðiárið 2016/2017. Að þessu sinni er úthlutað 369.925 tonnum í þorskígildum talið samanborið við um 368.394 þorskígildistonnum í fyrra, reiknað í þorskígildum fiskveiðiársins sem nú gengur í garð. Aukning á milli ára samsvarar því um 1.530 þorskígildistonnum.

HB Grandi með 10,3%

Fimmtíu stærstu fyrirtækin fá úthlutað sem nemur um 86,6% af því aflamarki sem úthlutað er og er það álíka og í fyrra. Alls fá 398 fyrirtæki eða lögaðilar úthlutað nú eða um 20 aðilum færra en í fyrra. Sé litið til þeirra sem eru með mesta úthlutun fær HB Grandi, líkt og í fyrra, mestu úthlutað til sinna skipa eða 10,3% af heildinni, næst kemur Samherji með 6% og þá Þorbjörn hf. með 5,5%. Þetta er sama röð efstu fyrirtækja og undanfarin ár.

Aukning í þorski

Úthlutun í þorski er rúmlega 194 þúsund tonn og hækkar um tæp 4.000 tonn frá fyrra ári. Ýsukvótinn er 27.523 tonn og dregst því saman um rúm 1.400 tonn. Rúmlega 1.200 tonna samdráttur er úthlutun á gullkarfa, 5.200 tonna samdráttur í löngu og 6.800 tonna samdráttur í úthlutun á íslenskri sumargotssíld. Úthlutað aflamark er alls 429.363 tonn sem er um 16 þúsund tonnum minna en á fyrra ári.

Guðmundur í Nesi hæsta skipið

 

Alls fá 504 skip og bátar úthlutað aflamarki að þessu sinni samanborið við 534 á fyrra fiskveiðiári. Það skip sem fær úthlutað mestu aflamarki er Guðmundur í Nesi RE, en hann fær 8.324 þorskígildistonn eða 2,25% af úthlutuðum þorskígildum.

Sjá nánar á vef Fiskistofu