sunnudagur, 18. ágúst 2019
 
TölublöðVenjuleg útgáfa

Ráðherra úthlutar sérheimildum

19. júlí 2019 kl. 09:33

Árlega fara 5,3 prósent heildarkvótans í strandveiðar, almennan byggðakvóta, aflamark Byggðastofnunar, línuívilnun, rækju- og skelbætur og frístundaveiðar

Kristján Þór Júlíusson, sjávarútvegs- og landbúnaðarráðherra, hefur ráðstafað rúmlega 31 þúsund tonnum til sérstakra aðgerða í fiskveiðistjórnunarkerfinu eða alls 23.316 þorskígildistonnum.

Um árlega úthlutun er að ræða sem byggir á lögum um stjórn fiskveiða en samkvæmt þeim er 5,3% af heildarafla í hverri fisktegund dregið af leyfilegum heildarafla til að mæta áföllum, til stuðnings byggðalögum,  línuívilnunar, strandveiða, rækju- og skelbóta, frístundaveiðar og til annarra tímabundinna ráðstafana til að auka byggðafestu. Ráðstöfunin byggir einnig á þingsályktunartillögu nr. 38/1945 frá árinu 2016.

„Stjórnvöld eru með þessari úthlutun að ráðstafa þeim aflaheimildum sem þau fara með forræði yfir,“ segir Kristján Þór í tilkynningu frá ráðuneytinu.

„Ég er þeirrar skoðunar að þessum miklu verðmætum megi úthluta með öðrum og betri hætti en nú er gert. Því skipaði ég í maí sl. starfshóp til að endurskoða núgildandi kerfi og vænti ég þess að hópurinn ljúki störfum í nóvember. Ég bind vonir við að afrakstur þeirrar vinnu megi nýta til að úthluta þessum verðmætum með betri og markvissari hætti en nú er.“

Leyfilegur heildarafli er minni en á síðasta fiskveiðiári, en fyrir fiskveiðiárið 2018/2019 var úthlutunin 32.380 af tonnum upp úr sjó eða alls 25.456 þorskígildistonnum. Ástæður fyrir því eru þær að þrátt fyrir að þorskstofninn sé sterkari en á liðnu fiskveiðiári hafa margar minni tegundir lækkað. Einnig hefur það áhrif að heildarafli ýsu er 28% minni en á síðasta fiskveiðiári. Þá má geta þess að lækkun magns í línuívilnun tekur mið af nýtingu línuívilnunar á þessu fiskveiðiári.

Sjá nánar á vef Atvinnuvega- og nýsköpunarráðuneytisins.