miðvikudagur, 26. febrúar 2020
 
TölublöðVenjuleg útgáfa

Ráðleggur aðeins 214 tonna humarafla

22. janúar 2020 kl. 15:30

Humar

Hafrannsóknastofnun veitir þá ráðgjöf um humarveiðar komandi árs að aðeins verði gefinn út rannsóknakvóti. Nýliðun er í sögulegu lágmarki. Að óbreyttu mun humarstofninn minnka enn frá því sem nú er.

Hafrannsóknastofnun ráðleggur að humarafli ársins 2020 verði ekki meiri en 214 tonn svo fylgjast megi með stærðarsamsetningu og dreifingu stofnsins.

Þetta kemur fram í fréttatilkynningu frá stofnuninni í dag.

Jafnframt leggur stofnunin til að allar humarveiðar verði bannaðar í Jökuldjúpi og Lónsdjúpi til verndar uppvaxandi humri. Til að minnka álag á humarslóð ráðleggur Hafrannsóknastofnun til að veiðar með fiskibotnvörpu verði áfram bannaðar á afmörkuðum svæðum í Breiðamerkurdjúpi, Hornafjarðardjúpi og Lónsdjúpi.

Í frétt Hafró segir að stofnstærð humars í stofnmælingu 2019 lækkaði um 20% frá árinu 2016. Á sama tíma hefur veiðihlutfall minnkað úr 1.9% í 0.4%. 

Þéttleiki humarholna við Ísland (0.07 holur/m2) mælist nú með því lægsta sem þekkist meðal þeirra humarstofna sem Alþjóðahafrannsóknaráðið (ICES) veitir ráðgjöf um.

Fyrirliggjandi gögn benda til að nýliðun sé í sögulegu lágmarki og að árgangar frá 2005 séu mjög litlir. Verði ekki breyting þar á má búast við áframhaldandi minnkun stofnsins.