fimmtudagur, 14. nóvember 2019
 
TölublöðVenjuleg útgáfa

Rækjuráðgjöf ársins komin frá Hafró

18. október 2019 kl. 14:40

Rækjustofnarnir eru yfir skilgreindum varúðarmörkum. MYND/Kristinn Benediktsson

Hafrannsóknastofnun telur óhætt að veiða 197 tonn af rækju í Arnarfirði og 568 tonn í Ísafjarðardjúpi á vertíðinni 2019-2020.

Hafrannsóknastofnun hefur gefið út ráðgjöf fyrir rækju í Arnarfirði og í Ísafjarðardjúpi. Stofnunin leggur til að leyfðar verði veiðar á 197 tonnum af rækju í Arnarfirði og 568 tonnum í Ísafjarðardjúpi á vertíðinni 2019/2020.

Ráðgjöfin er gerð með hliðsjón af niðurstöðum könnunar á ástandi innfjarðarrækjustofna sem fram fór dagana 1.-11. október.

Stofnvísitala rækju í Arnarfirði reyndist vera „nálægt sögulegu lágmarki en yfir skilgreindum varúðarmörkum. Rækjan í Arnarfirði var smærri en undanfarin ár. Mikið var af þorsk- og ýsuseiðum í Arnarfirði og mældist meira af þorski en undanfarin þrjú ár.“

Þá mældist stofnvísitala rækju í Ísafjarðardjúpi „undir meðallagi en yfir skilgreindum varúðarmörkum. Útbreiðsla rækjunnar var að miklu leyti takmörkuð við svæðið innst í Ísafjarðardjúpi. Nýliðunarvísitala rækju var langt undir meðallagi árin 2016–2019.“

Þá greinir stofnunin frá því að vísitala þorsks hafi „farið lækkandi frá árinu 2012 en magn þorsks var töluvert meira í október 2019 en undanfarin þrjú ár. Vísitala ýsu hefur haldist há frá 2004. Mikið var af ýsuseiðum á svæðinu í október 2019.“

Stofnunin segir ástand rækjustofna í Húnaflóa, Skagafirði, Skjálfanda og Öxarfirði ekki hafa verið kannað að þessu sinni: „Ráðgjöf stofnunarinnar hefur undanfarin ár verið að ráðleggja að engar veiðar séu stundaðar á þessum svæðum vegna slæms ástands stofnanna.“