miðvikudagur, 23. september 2020
 
TölublöðVenjuleg útgáfa

Rúmlega 20.000 tonn á fiskveiðiárinu

8. september 2020 kl. 13:30

Frystitogarinn Blængur gerði sinn besta túr á síðasta fiskveiðiári. Mynd/Smári Geirsson

Aflabrögð á togurum Síldarvinnslunnar og dótturfélags þess, Bergs-Hugins, voru góð á síðasta fiskveiðiári þrátt fyrir að við erfiðar aðstæður hafi verið við að glíma - stanslausar brælur og frátafir vegna þeirra.

Afli togara Síldarvinnslunnar og Bergs-Hugins, dótturfélags þess, á fiskveiðiárinu sem var að líða var samtals 20.800 tonn . 

Frá aflabrögðum segir á heimasíðu Síldarvinnslunnar þar sem til þess er tekið að fiskveiðiárið megi kallast viðburðaríkt enda hófu tvö ný skip, Vestmannaey VE og Bergey VE, veiðar á árinu. Ný Vestmannaey hóf veiðar í byrjun októbermánaðar og ný Bergey VE í janúar. Um tíma var Smáey VE jafnframt gerð út en í febrúarmánuði var skipið leigt Samherja hf. og það síðan selt Þorbirni hf. í Grindavík í maímánuði. 

Útgerð nýju skipanna hefur gengið afar vel frá upphafi og lönduðu þau 6.200 tonnum samtals á sínu fyrsta fiskveiðiári, segir í fréttinni.

Í samantekt heimasíðunnar segir að veðurfarslega hafi síðasta haust verið mönnum erfitt og enn versnaði tíðarfarið þegar kom fram á veturinn. Til að mynda lönduðu Vestmannaeyjaskipin engum afla fyrr en eftir miðjan janúar í kjölfar jólastopps vegna stöðugrar brælu við suðurströnd landsins.

„Eftir hinn erfiða vetur tók við mikið fall á eftirspurn eftir ferskum fiski vegna óvissu og aðgerða sem tengdust covid-19 faraldrinum. Hægt var á sókn ísfisktogara vegna þessa frá marsmánuði og fram í maí og var í reynd enginn fiskur veiddur til fersks útflutnings nema hann væri fyrirfram seldur,“ segir þar.

Hjá öllum skipunum var stöðugur eltingaleikur við ufsa. Gekk erfiðlega að finna hann og kemur það til dæmis fram í aflatölum hjá Gullver NS en skipið fiskaði rúmlega helmingi minna af ufsa á nýliðnu kvótaári en á árinu á undan eða einungis 540 tonn í stað 1.205 tonna. Þrátt fyrir þetta gekk útgerð Gullvers vel á árinu og var heildarafli skipsins 5.300 tonn eins og að framan greinir þó um minni sókn hafi verið að ræða.

Afar vel gekk að veiða djúpkarfa og grálúðu hjá frystitogaranum Blængi NK „en hápunktur ársins hjá skipinu var þó Barentshafstúrinn sem farið var í í júnímánuði sl. Um var að ræða mettúr hjá Blængi en aflinn var 1430 tonn upp úr sjó að verðmæti 512 milljónir króna fob.“ 

Á nýliðnu kvótaári leigði Síldarvinnslan til sín aflaheimildir sem námu 1.205 tonnum og náðist allur kvóti að undanskildum örfáum kílóum af flatfiskum.

Afli hvers skips var sem hér segir (miðað er við slægðan afla). 

Gullver NS                     5.300 tonn

Bergey VE                     2.900 tonn

Vestmannaey VE         3.300 tonn

Smáey VE                     2.000 tonn (einungis gerð út hluta úr árinu)

Blængur NK                  7.300 tonn