föstudagur, 15. janúar 2021
 
TölublöðVenjuleg útgáfa

Rússar þjófstarta á Reykjaneshrygg

30. apríl 2011 kl. 12:31

Eftirlitsflugvél Landhelgisgæslunnar

Sex rússneskir togarar og einn spænskur byrjaðir veiðar þótt ekki megi byrja fyrr en 10. maí samkvæmt samþykkt NEAFC.

Við eftirlitsflug Sifjar, flugvélar Landhelgisgæslunnar í gær  var komið að sex rússneskum og einum spænskum togara að veiðum á Reykjaneshrygg á úthafskarfaveiðisvæði en samkvæmt reglum Norðaustur Atlantshafsfiskveiðinefndarinnar-NEAFC (North East Atlantic Fisheries Commission),  mega úthafskarfaveiðar ekki hefjast fyrr en 10 maí.

Með greiningarbúnaði flugvélar Landhelgisgæslunnar sást greinilega að togararnir voru allir með veiðarfæri í sjó. Eitt skipanna var auk þess með slökkt á ferilvöktunarbúnaði.

Á heimasíðu sjávarútvegsráðuneytisins segir að á fundi nefndarinnar í mars sl. náðist samkomulag um veiðar úthafskarfa á Reykjaneshrygg milli Íslands, Grænlands, Færeyja,  Evrópusambandsins og Noregs en fulltrúar Rússlands mættu ekki til fundarins. Viðræður hafi staðið yfir árum saman en samkomulagið sem gert var gildir út árið 2014.

Málið verður kannað nánar, segir í frétt frá Gæslunni.