sunnudagur, 25. ágúst 2019
 
TölublöðVenjuleg útgáfa

Samfelld vinnsla á loðnuhrognum hjá Síldarvinnslunni

6. mars 2017 kl. 15:36

Það er mikið að gera í hrognavinnslu hjá Síldarvinnslunni þessa dagana. Ljósm. Hákon Ernuson. Mynd af vef SVN

Engri loðnu hefur verið landað í fiskimjölsverksmiðjuna á Seyðisfirði síðustu daga

Þessa dagana er samfelld hrognavinnsla í Neskaupstað og Helguvík, að því er fram kemur á vef Síldarvinnslunnar. 

Í Neskaupstað var lokið við að kreista hrogn úr Berki NK í gær og nú er verið að kreista úr Margréti EA. Síðar í dag hefst löndun úr Hákoni EA og á eftir honum kemur Beitir NK sem nú er á austurleið með 2.600 tonn. Í Helguvík var klárað að kreista úr Vilhelm Þorsteinssyni EA í nótt og nú er Polar Amaroq að landa þar hrognaloðnu.

Öll áhersla er lögð á hrognavinnsluna um þessar mundir og því hefur engri loðnu verið landað í fiskimjölsverksmiðjuna á Seyðisfirði síðustu daga. Alls hafa um 13.560 tonn borist til verksmiðjunnar og er lokið við að vinna hráefnið.