mánudagur, 8. mars 2021
 
TölublöðVenjuleg útgáfa

Samherji veitir hvatningarverðlaun

4. apríl 2011 kl. 16:30

Fiskvinnsla Samherja á Dalvík

Heilsuátak meðal starfsmanna á sjó og í landi hefur skilað góðum árangri.

Samherji hf. hefur ákveðið að veita 13 starfsmönnum sínum sérstök hvatningarverðlaun fyrir framúrskarandi mætingu til vinnu á árinu 2010. Starfsmennirnir fá hver um sig ferðaávísun að upphæð 100 þúsund krónur. Þetta er fjórða árið í röð sem fyrirtækið veitir slíka viðurkenningu.  

Það er stefna Samherja að stuðla að bættri heilsu og vellíðan starfsmanna sinna. Einn liður í því er að greiða niður kostnað við líkamsrækt og ýmsa íþróttaiðkun starfsmanna. Á liðnu ári nýttu rúmlega hundrað starfsmenn sér sérstakan íþróttastyrk Samherja og hefur þeim sem nýta sér styrkinn farið stöðugt fjölgandi frá því byrjað var á slíkum styrkveitingum fyrir sjö árum.

Samstarf Samherja og fyrirtækisins Heilsuverndar er hluti af heilsustefnu fyrirtækisins. Fylgst er með heilsufari starfsfólks með reglulegum mælingum auk þess sem Heilsuvernd gefur út pistla um bætta heilsu og er þeim dreift á starfstöðvum Samherja.

 Annar angi þess að stuðla að bættri heilsu starfsmanna er að sérstakt heilsuátak stendur yfir á skipum Samherja. Átakið felst m.a. í því að breyta mataræðinu um borð og stuðla að aukinni hreyfingu, bæði um borð og í frítíma sjómanna. Það verkefni hefur verið í gangi hjá Samherja í fjögur ár. Markmiðið með heilsuátakinu er að auka almennt heilbrigði og fækka álagstengdum slysum. Nú þegar hefur náðst sýnilegur árangur sem mikil ánægja er með, segir í frétt frá Samherja.

Sjá nánar á vef Samherja