fimmtudagur, 24. júní 2021
 
TölublöðVenjuleg útgáfa

Samið við Grænland um gullkarfa

19. september 2015 kl. 12:51

Gullkarfi

Íslendingar fá 90% kvótans en Grænlendingar 10%

Undirritaður hefur verið tvíhliða samningur milli Íslands og Grænlands um gullkarfa. Samningurinn er til þriggja ára og felur í sér skiptinguna 90% fyrir Ísland og 10% fyrir Grænland. Auk þess er gert ráð fyrir 350 tonna afla annarra þjóða á hverju ári samningsins, að því er fram kemur á vef sjávarútvegsráðuneytisins.

Í samningnum er ákveðin nýtingaráætlun sem felur í sér aflareglu, sem er sú hin sama og íslensk stjórnvöld samþykktu á síðasta ári eftir að Alþjóðahafrannsóknaráðið yfirfór hana með tilliti til hámarks langtíma afraksturs og alþjóðlegra varúðarsjónarmiða.

Jafnframt var gerður samningur um landanir grænlenskra skipa í íslenskum höfnum fyrir árið 2015. Geta grænlensk skip á þessu ári landað allt að 50 þúsund tonnum af makríl og 15 þúsund tonnum af norsk-íslenskri síld.

Góð samskipti Íslands og Grænlands á sjávarútvegssviði eru afar þýðingarmikil báðum þjóðum. Þessi samningur mun styrkja enn frekar samstarf þessara þjóða og tryggja ábyrgar veiðar úr þessum sameiginlega stofni þjóðanna.

Formaður samninganefndar Grænlands var Emanuel Rosing skrifstofustjóri í grænlenska sjávarútvegsráðuneytinu og formaður þeirrar íslensku var Jóhann Guðmundsson skrifstofustjóri í atvinnuvega- og nýsköpunarráðuneytinu.