sunnudagur, 15. desember 2019
 
TölublöðVenjuleg útgáfa

Samkeppni um nýja mynd á Sjávarútvegshúsið

17. nóvember 2017 kl. 15:12

Harðlega var gagnrýnt þegar málað var yfir myndina á húsinu nýlega. Mynd/atvinnuvegaráðuneytið

Höfundum er frjálst að velja þá efnisútfærslu sem þeir telja henta hugmynd sinni best, en verkið skal hafa endingu í að minnsta kosti þrjú ár.

Atvinnuvega- og nýsköpunarráðuneytið, í samvinnu við SÍM Samtök íslenskra myndlistarmanna, hefur undirbúið samkeppni um nýtt listaverk á húsgaflinn á Sjávarútvegshúsinu og skal verkið hafa skírskotun í sögu sjávarútvegs á Íslandi.  Eins og kunnugt er voru ekki allir sáttir við að málað var yfir verkið sem fyrr prýddi húsgaflinn, og er tilefni samkeppninnar þaðan komið.

Í kynningarefni segir: „Höfundum er frjálst að velja þá efnisútfærslu sem þeir telja henta hugmynd sinni best, en verkið skal hafa endingu í að minnsta kosti þrjú ár. Mikilvægt er að verkið taki tillit til umhverfisins, falli vel að svæðinu og þoli íslenska veðráttu.“

Um samkeppnina gilda samkeppnisreglur Sambands íslenskra myndlistarmanna (SÍM). Þátttaka í samkeppninni er opin öllum skapandi einstaklingum og hópum. Dómnefnd skipuð fulltrúum Atvinnuvega- og nýsköpunarráðuneytisins og SÍM mun velja eina af tillögunum sem berast til útfærslu.

Vinningstillagan mun hljóta kr. 250.000,- í verðlaun. Atvinnuvega- og nýsköpunarráðuneytið mun standa straum af kostnaði við gerð og uppfærslu verksins að hámarki tvær milljónir.

Tillögum skal skilað inn fyrir kl.16:00 fimmtudaginn 18. janúar 2018. Niðurstaða dómnefndar verður kynnt í síðasta lagi 23. febrúar 2018 og sýning á tillögum sem bárust í keppnina haldin að því loknu á vef Atvinnuvega- og nýsköpunarráðuneytisins.