mánudagur, 21. júní 2021
 
TölublöðVenjuleg útgáfa

Segja rangt farið með afkomu

13. janúar 2014 kl. 17:41

Gert að fiski um borð í Vestmannaey. (Mynd: Óskar P. Friðriksson)

SA gerir athugasemdir við yfirlýsingar einstakra verkalýðsforingja um afkomu sjávarútvegsfyrirtækja.

„Í umræðu í tengslum við nýgerða kjarasamninga og svigrúm atvinnulífsins til launahækkana hefur ítrekað verið farið rangt með afkomutölur sjávarútvegsins,“ segir í fréttatilkynningu á vef Samtaka atvinnulífsins. 

Þar segir að árið 2012, sem verið hafi eitt besta afkomuárið í sögu sjávarútvegs á Íslandi, hafi hagnaður eftir skatta numið 35 milljörðum króna. Frá þeim tíma hafi afurðaverð lækkað, t.d. sjófrystar afurðir um 14%, og afkoman því versnað. 

„Þrátt fyrir að opinberar afkomutölur sjávarútvegsins liggi fyrir víla einstaka verkalýðsforingjar ekki fyrir sér að ýkja stórlega afkomu sjávarútvegsins með því að fjalla um rekstrarafgang greinarinnar fyrir greiðslu fjármagnskostnaðar og skatta. Gera verður þá kröfu að rétt sé farið með en ítrekað hefur verið fullyrt í opinberri umræðu að hagnaður sjávarútvegins sé rúmlega tvöfalt meiri heldur en hann raunverulega er,“ segir í fréttatilkynningu SA. 

 Fram kemur að á árinu 2012 greiddu sjávarútvegsfyrirtæki 85 milljarða króna í laun, 10 milljörðum meira en árið 2010. Sérstakt átak hafi verið gert árið 2011 til að hækka laun fiskvinnslufólks umfram aðra. Laun sjómanna séu beintengd afurðaverði og þróist því með sama hætti og afkoma útgerða en sjómenn séu meðal tekjuhæstu stétta á Íslandi.

Framlag greinarinnar til þjóðarbúsins sé einnig umtalsvert en skattgreiðslur sjávarútvegsfyrirtækja hafa stóraukist á undanförnum árum, úr 11 milljörðum 2010 í 20 milljarða 2012.