miðvikudagur, 19. febrúar 2020
 
TölublöðVenjuleg útgáfa

Síldveiðar fara vel af stað eftir sjómannadaginn

10. júní 2010 kl. 16:26

Íslensku síldveiðiskipin fóru flest til veiða í byrjun vikunnar eftir það hlé sem gert var á veiðunum vegna sjómannadagsins. Ekki er hægt að segja annað en að byrjunin lofi góðu því skipin hafa verið að fá góðan afla eftir stuttan togtíma.

Ingunn AK landaði á Vopnafirði um hádegisbilið í gær og segir Guðlaugur Jónsson skipstjóri á heimasíðu HB Granda að skamman tíma hafi tekið að ná skammtinum.

,,Við vorum komnir á miðin um hádegisbilið á þriðjudag og hófum veiðar skömmu síðar. Þá voru alls átta íslensk skip og eitt færeyskt komin á svæðið. Við tókum tvö stutt hol og fengum 350 tonn af síld og vorum lagðir af stað áleiðis í land um kvöldmatarleytið,“ segir Guðlaugur en hann upplýsir að svo virðist sem að töluvert magn sé af síld á veiðisvæðinu. Hún sé hins vegar horuð enn sem komið er og töluverð áta sé í henni.

Síldin, sem Ingunn kom með til Vopnafjarðar, er af jafnri stærð, um 320 til 330 grömm að þyngd, og nýtingin í vinnslunni er góð þar sem sáralítið hefur flokkast frá. Síldin er öll unnin í samflök og var áætlað að vinnslu á aflanum úr Ingunni lyki um hádegisbil í dag. Lítið hlé ætti þó að verða á vinnslu hjá fiskiðjuveri HB Granda á Vopnafirði því von er á Faxa RE þangað með um 450 tonn af síld nú í hádeginu. Lundey NS fór frá Vopnafirði í gærkvöldi og er skipið væntanlegt á miðin í dag.